ކެފޭއަކަށް ގެއްލުން ދިން މައްސަލައިގައި ދެ މީހަކު ހައްޔަރުކޮށްފި

މާލޭގެ ހަވީރީ ހިނގުމުގައި ހުންނަ ލެޓްސް ކޮފީ މޯލްޑިވްސް އަށް ގެއްލުން ދިން މައްސަލައިގެ ތުހުމަތުގައި ދެ މީހަކު ހައްޔަރުކޮށްފި އެވެ.

ލެޓްސް ކޮފީ މޯލްޑިވްސް އަށް ބަޔަކު ވަދެ ގެއްލުން ދިނީ މިމަހުގެ 12 ވަނަ ދުވަހު އެވެ.

ފުލުހުން ބުނީ ލެޓްސް ކޮފީ މޯލްޑިވްސް އަށް ވަދެ ތޫނު ހަތިޔާރު ބޭނުންކޮށްގެން އެތަނުގެ މުވައްޒަފުންނަށް ބިރު ދައްކައި މުދަލަށް ގެއްލުންދިން މައްސަލައިގައި ގއ. ދެއްވަދޫ، ވައިލެޓްމާގެ، އަހުމަދު ތައުފީގު (31އ) އާއި ބ. ތުޅާދޫ، މީޒާން، އަސަދުﷲ ހާތިމް (44އ) ހައްޔަރުކޮށްފައިވާ ކަމަށެވެ.

އެ މީހުން ހައްޔަރުކޮށްފައިވަނީ ކޯޓު އަމުރެއްގެ ދަށުން މިމަހުގެ 16 ވަނަ ދުވަހު އެވެ.

އެ މީހުންގެ ބަންދާ މެދު ގޮތެއް ނިންމުމަށް ކޯޓަށް ހާޒިރުކުރުމުން ފަސް ދުވަހަށް ބަންދުގައި ބޭތިއްބުމަށް އަމުރުކޮށްފައިވާ ކަމަށްވެސް ފުލުހުން ބުނެފައިވެ އެވެ.

ފުލުހުން ދަނީ މި މައްސަލަ ތަހުގީގު ކުރަމުންނެވެ.