އިންޓަނޭޝަނަލް ކޯޗިން ފެޑެރޭޝަން (އައިސީއެފް) އާއި ވޯލްޑް އޮފް ޓުމޯރޯ (ޑަބްލިއުއޯޓީ) ގުޅިގެން ރާއްޖޭގައި މާސްޓާ ކްލާސްތަކެއް ބޭއްވުމަށް ތައްޔާރުވާން ފަށައިފި އެވެ.
މި މާސްޓާ ކްލާސްތަކަކީ ޕަބްލިކް އަދި ޕްރައިވެޓް ސެކްޓާގެ ތެރޭގައި ހިމެނޭ ތަފާތު އެކި ފަންތީގެ މީހުންނަށް އަމާޒުކޮށްގެން ތައްޔާރުކުރެވިފައިވާ ކްލާސްތަކެއް ކަމަށް ޑަބްލިއުއޯޓީ އިން ބުނެފައިވެ އެވެ.
މާސްޓާ ކްލާސްތަކުގެ ފުރަތަމަ އިންސްޓޯލްމަންޓް އޮންނާނީ އޮކްޓޯބަރު 23 އިން 25 އަށް ވިލާ ނޯޓިކާ ގައެވެ. ޑަބްލިއުއޯޓީ އިން ބުނި ގޮތުގައި މި ކްލާސްތައް ވެގެންދާނީ އެކިއެކި ދާއިރާތަކުން ކުރިއަށްދާން ބޭނުންވާ މީހުންނަށް ވަރަށް އަގުހުރި ފުރުސަތަކަށެވެ.
މާސްޓާ ކްލާސްތައް ހިންގުމުގެ ތެރޭގައި އެންމެ އިސްކޮށް އުޅުއްވާނީ އައިސީއެފްގެ ނައިބް ރައީސް ރޮބަޓް ގާސިއާ އެވެ. އޭނާ ވަނީ ދުނިޔޭގެ އެކި ޖަމިއްޔާތަކަށް ކޯޗް ކޮށްދީފައި ކަމަށާއި ކޯޗިން ސަގާފަތްތައް ތަރައްގީ ކުރުމަށް އައިސީއެފްއިން އެކުލަވާލާފައިވާ ހާއްސަ ބިޒްނަސް ޔުނިޓް ލީޑް ކުރުމުގެ ޒިންމާ އުފުލަނީވެސް އޭނާ ކަމަށް ޑަބްލިއުއޯޓީ އިން ބުންޏެވެ.
ވިޔަފާރި، ހިއުމަން ރިސޯސް މެނޭޖްމަންޓް، ސޭލްސް، އޮޕަރޭޝަންސް، ލީޑަޝިޕް ކޮންސަލްޓިން އަދި ޑައިވާސިޓީގެ ތަޖުރިބާ ބޮޑު ބޭފުޅެއް ކަމަަށްވާ ރޮބަޓް ގާސިއާ އަކީ ކަސްޓަމަރުންގެ ލޯޔަލިޓީ ކަށަވަރުކޮށް އުފެއްދުންތެރިކަން އިތުރުކުރުމަށް އާ ސްޓްރެޓެޖީތައް ތަންފީޒުކުރުމަށް ވައުދުވެފައިވާ ތަޖުރިބާކާރު ބޭފުޅެއް ކަމަށްވެސް ޑަބްލިއުއޯޓީ އިން ބުނެ އެވެ. އޭނާ ވަނީ 50 އަށް ވުރެ ގިނަ ގައުމުގައި މިފަދަ ކްލާސްތައް ނަންގަވާފަ އެވެ.
ޑަބްލިއުއޯޓީ އިން ބުނީ ކޯޗިން އަކީ މުސްތަގުބަލަށް ބަލާއިރު ހަމައެކަނި ސަގާފީ މެންޓާޝިޕެއް ނޫން ކަމަށާއި އެއީ ބަދަލު ބަލައިގަތުމާއި، ކުރިއެރުމުގެ ފުރުސަތުތައް އަތުލައިގަތުމާއި، އަބަދުވެސް ކުރިއަރަމުން އަންނަ ވިޔަފާރިއާއި މާހައުލެއްގައި ލީޑަޝިޕް އަލުން ތަސައްވުރުކުރުވާނެ ކަމެއް ކަމަށެވެ.
މި މާސްޓަކްލާސް ސީރީޒްގެ ތެރޭގައި ރޮބަޓް ގާސިއާ "ދަ ފިއުޗާ ލޭންޑްސްކޭޕް އޮފް ކޯޗިން އިން އޮގަނައިޒޭޝަންސް" އަށް ފުންކޮށް ވިސްނަން ބުނެދީ އަދި ކުންފުނިތަކުގައި ކޯޗިން ތަރައްގީވަމުން އަންނަ މަންޒަރު ފާހަގަކޮށް، ސްޓްރެޓެޖިކް ލަނޑުދަނޑިތައް ވަރުގަދަ އޯގަނައިޒޭޝަނަލް ކަލްޗަރަކާ އެއްގޮތްކުރުމުގެ މުހިއްމު ކަމަށް ވާހަކަދައްކަވާނެ އެވެ. ވިޔަފާރިއާއި ހުނަރު ބެލެހެއްޓުމުގައި ކޯޗިންގެ މުހިއްމު ދައުރު ދެނެގަތުމާއި، ދެމެހެއްޓެނިވި ނަތީޖާތަކަށް ކުރާ އަސަރު މިންކުރާނެ ގޮތުގެ އަގުހުރި ވިސްނުންތަކެއް މި ކްލާސްތަކުން ލިބިގެންދާނެ އެވެ.
މީގެ އިތުރުން ކޯޗިން އިން އިނޮވޭޝަން ކުރިއެރުވުމާއި، އުފެއްދުންތެރިކަން އިތުރުކޮށް، އޯގަނައިޒޭޝަންތަކުގެ ތެރޭގައި އެންގޭޖްމަންޓް އިތުރުކުރެވޭނެ ގޮތްތައްވެސް މާސްޓަކްލާސްތަކުގައި ދިރާސާ ކުރާނެ ކަމަށް ޑަބްލިއުއޯޓީ އިން ބުނެފައިވެ އެވެ.
ޑަބްލިއުއޯޓީ އިން ބުނި ގޮތުގައި މި މާސްޓަކްލާސްތައް ވެގެންދާނީ ވާދަވެރި ކުރިއެރުމެއް ހޯދުމާއި، ލީޑަޝިޕްގެ ހުނަރު އިތުރުކުރުމާއި، ތަރައްގީވަމުން އަންނަ މަންޒަރަށް ހޭނުމަށް ލިބޭނެ ފުރުސަތަކަށެވެ.