ރާއްޖޭގައި ނަފްސާނީ ދުޅަހެޔޮކަމާ ބެހޭގޮތުން ހޭލުންތެރިކަން އިތުރުކުރުމަށް ބާއްވާ ފުރަތަމަ މެންޓަލް ހެލްތު ކޮންފަރެންސް ފަށައިފި އެވެ.
މިކޮންފަރެންސަކީ އައިޖީއެމް އެޗްގެ ދަށުން ހިންގާ ނެޝަނަލް ސެންޓަ ފޯ މެންޓަލް ހެލްތުން އިންތިޒާމުކޮށްގެން "އޮއެވަރު"ގެ ނަމުގައި ބާއްވާ ކޮންފަރެންސެކެވެ.
އަހަރަކު އެއްފަހަރު ބާއްވާ މި ކޮންފަރެންސަކީ ނަފްސާނީ ދުޅަހެޔޮކަމާ ބެހޭގޮތުން ހޭލުންތެރިކަން އިތުރުކުރުމަށް ޖަމިއްޔާ ޖަމާއަތްތަކާ މެދުގައި ވާހާކަ ދެކެވި މަޝްވަރާ ކުރުމަށް ބޭއްވި ކޮންފަރެންސެކެވެ.
މި ކޮންފަރެންސްގެ ސެޝަންތައް ކުރިއަށް ގެންދާނީ މިއަދުގެ ނިޔަލަށް މާލެ އަތޮޅު ވިލާ ނޯޓިކާ ޕެރަޑައިސް ރިސޯޓުގަ އެވެ. ސެޝަންތަކުގައި ކީނޯޓް ސްޕީޗުތަކާއި ރިސާޗު ހުށަހެޅުންތަކާއި އަދި ޕެނަލް ޑިސްކަޝަންތައްވެސް ކުރިއަށް ގެންދެ އެވެ.
ކޮންފަރެންސްގެ ފުރަތަމަ ބައި ކަމަށްވާ ޕްރީ ކޮންފަރެންސް ވޯކްޝޮޕްތައް އިއްޔެ ކުރިއަށް ގެންދިޔައީ ހ. މީރުމާ ހޯލު ގައެވެ.
އައިޖީއެމްއެޗުން ނެރުނު ބަޔާނެއްގައި ބުނެފައިވަނީ މި ކޮންފަރެންސްގެ މި އަހަރުގެ ޝިއާރަކީ "ޗޭންޖިން ކަރަންޓްސް - ފޯމިން ކަނެކްޝަންސް" އެވެ.
ޕެރަޑައިސް ރިސޯޓުގައި މިއަދު ހެނދުނު ބޭއްވި ރަސްމިއްޔާތުގައި ރައީސް އިބްރާހިމް މުހައްމަދު ސޯލިހްގެ އަނބިކަނބަލުން ފަޒްނާ އަހްމަދު ބައިވެރިވެވަޑައިގެން ތަގުރީރުކުރެއްވި އެެވެ.
އައިޖީއެމް އެޗުން ބުނި ގޮތުގައި މިކޮންފަރެންސްގައި 100 އަށް ވުރެ ގިނަ މީހުން ބައިވެރިވާން ރަޖިސްޓްރީ ކޮށްފައިވެ އެވެ.
