ދަ ޑިމޮކްރެޓްސްއަށް މެންބަރުން އިތުރުކުރުމަށް ހާއްސަ ކެމްޕޭނެއް މިއަދު ކުރިއަށް ގެންދިއުމަށް ނިންމައިފި އެވެ.
ދަ ޑިމޮކްރެޓްސްގެ މާލޭގެ މައި ހަރުގޭގައި މި ހަރަކާތް ފެށުމަށް ހަމަޖެހިފައިވަނީ މިއަދު ހަވީރު 4:00 ހާއިރު އެވެ.
އިލެކްޝަންސް ކޮމިޝަން (އީސީ) އިން ބަލަހައްޓަމުން ގެންދާ ސިޔާސީ ޕާޓީތަކުގެ ދަފްތަރުގައިވާ ގޮތުން މިދިޔަ އޮގަސްޓް ހަތްވަނަ ދުވަހުގެ ނިޔަލަށް އެ ޕާޓީގައި މެންބަރުންގެ ގޮތުގައި ތިބީ 3،280 މެންބަރުންނެވެ.
ސިޔާސީ ޕާޓީއެއްގެ ގޮތުގައި ދަ ޑިމޮކްރެޓްސް ރަޖިސްޓްރީ ކުރުމަށް ހުށަހެޅީ މިއަހަރުގެ މެއި 21 ވަނަ ދުވަހު އެވެ. އެ ޕާޓީ އުފެއްދުމަށް ހުއްދަ ދިނީ މެއި 24 ވަނަ ދުވަހު އެވެ. ސިޔާސީ ޕާޓީއެއްގެ ގޮތުގައި ދަ ޑިމޮކްރެޓްސް ރަޖިސްޓްރީކޮށްދިނުމަށްފަހު ދަފްތަރު ކުރީ މިއަހަރުގެ ޖުލައި 12 ވަނަ ދުވަހު އެވެ.
ރާއްޖޭގައި އެންމެ ފަހުން އުފެއްދި ސިޔާސީ ޕާޓީ -- ދަ ޑިމޮކްރެޓްސް އިން ވަނީ ނިމިގެންދިޔަ ރިޔާސީ އިންތިހާބުގައި ކެންޑިޑޭޓަކުވެސް ނެރެފަ އެވެ. އެގޮތުން އެ ޕާޓީން ނެރުނު ކެންޑިޑޭޓް އިލްޔާސް ލަބީބް ވަނީ 15،839 ވޯޓު ހޯދާފަ އެވެ.
ރައްޔިތުންގެ މަޖިލީހުގައި މައިނޯރިޓީ ޕާޓީ އަކީވެސް ދަ ޑިމޮކްރެޓްސް އެވެ. ރައްޔިތުންގެ މަޖިލީހުގެ ރައީސް މުހައްމަދު ނަޝީދާއި މަޖިލީހުގެ ނައިބް ރައީސް އީވާ އަބްދުﷲ އާއި އަދި އެ ދެ ބޭފުޅުން ނުތިއްބަވާ ވަގުތުތަކުގައި މަޖިލީހުގެ ރިޔާސަތު ދެން ބަލަހައްޓަވަމުން ގެންދަވާ ވިލުފުށި ދާއިރާގެ މެންބަރު ހަސަން އަފީފަކީ ވެސް ދަ ޑިމޮކްރެޓްސް އަށް ނިސްބަތްވާ ބޭފުޅުންނެވެ.