ދައުލަތުގެ ބައެއް އިދާރާތަކާއި ސަރުކާރު ހިއްސާވާ ބައެއް ކުންފުނިތަކުން ކުރިއަށް ގެންދާ ބައެއް މަސައްކަތްތައް ހުއްޓުވަނީ އެކަންކަން ނުހުއްޓުވައިފިނަމަ އެކަމުގެ ސަބަބުން ދައުލަތާއި ރައްޔިތުންނަށް އިއާދަ ނުކުރެވޭ ފަދަ ގެއްލުމެއް އޮވެދާނެތީ ކަމަށް އެންޓި ކޮރަޕްޝަން ކޮމިޝަން (އޭސީސީ) އިން ބުނެފި އެވެ.
ވެރިކަން ބަދަލުކުރުމުގެ މަރުހަލާ ހިނގަމުންދާއިރު ދައުލަތުގެ ބައެއް އިދާރާތަކާއި ސަރުކާރު ހިއްސާވާ ބައެއް ކުންފުނިތަކުން ކުރަމުންދާ ބައެއް މަސައްކަތްތައް އޭސީސީ އިން ހުއްޓުވަމުން ގެންދާތީ ސަރުކާރަށް ތާއީދުކުރާ ބައެއް މީހުން ގެންދަނީ އޭސީސީއަށް ވަރަށް ބޮޑަށް ފާޑުކިޔަމުންނެވެ.
އޭސީސީ އިން މިއަދު ނެރުނު ބަޔާނެއްގައި ބުނެފައިވަނީ ބައެއް މަސައްކަތްތައް އޭސީސީ އިން ހުއްޓުވަނީ އެކަންކަމާ ގުޅިގެން ކޮމިޝަނަށް ހުށަހަޅާ މައްސަލަތަކާ ގުޅޭ ތަހުގީގުތައް ކުރިއަށް ގެންދިއުމުގެ ބޭނުމުގައި ކަމަށެވެ. އަދި އެގޮތަށް އަންގާ އެންގުމަކީ ވަގުތީ އެންގުންތަކެއްކަން ފާހަގަކޮށް ބަޔާނުގައި ބުނެފައިވަނީ ކޮމިޝަނުން ބަލަންޖެހޭ ކަންކަން ބެލުމަށްފަހު އެފަދަ އެންގުމަކަށް ބަދަލު ގެންނަންޖެހޭނަމަ އެ ބަދަލެއް ގެނެސް މައްސަލަ ރައްދުވާ ފަރާތަށް އަންގާނެ ކަމަށެވެ.
ވަކިކަމެއް ވަގުތީގޮތުން މަޑުޖައްސާލުމަށް އިދާރާތަކަށް އެންގި ނަމަވެސް އެފަދަ އިދާރާތަކުން އާންމު ރައްޔިތުންނަށް ދެމުންގެންދާ އަސާސީ ހިދުމަތެއް ނުވަތަ އެތަނެއްގެ އިދާރީ ހިންގުންފަދަ އެއްވެސް ކަމެއް ހުއްޓާލުމަށް އަންގާފައި ނުވާނެ ކަމަށްވެސް ކޮމިޝަނުން ބުނެ އެވެ.
"އަދި ކޮމިޝަނުން ވަކި ކަމެއް މަޑުޖައްސާލުމަށް އަންގާ މައްސަލަތަކުގެ ތަހުގީގުތައް ވީހާވެސް އަވަހަށް ނިންމުމަށް، ކޮމިޝަނުން ހާއްސަ ސަމާލުކަމެއް ދީގެން މަސައްކަތް ކުރަމުން ގެންދާކަން މިފުރުސަތު ފާހަގަކުރަމެވެ." ބަޔާނުގައިވެ އެވެ.