ކޮމިޝަނާ ޖެނެރަލް އޮފް ކަސްޓަމްސް އަބްދުﷲ ޝަރީފް ރިޓަޔާކުރައްވައިފި އެވެ.
ޝަރީފް މިއަދު ރިޓަޔާކުރައްވާފައި މިވަނީ ކަސްޓަމްސްގައި 28 އަހަރު ހިދުމަތް ކުރެއްވުމަށްފަހު އެވެ.
ކަސްޓަމްސްގެ ކޮމިޝަނާ ޖެނަރަލްގެ މަގާމުގައި ހުންނެވި އަހްމަދު ނޫމާން އަވަހާރަވުމާ ގުޅިގެން އެ މަގާމަށް ޝަރީފް އައްޔަންކުރެއްވީ ޖޫން 23، 2020 ގައެވެ. އޭރުން އޭނާ ހުންނެވީ ކަސްޓަމްސްގެ ޑެޕިއުޓީ ކޮމިޝަނާ ޖެނަރަލްގެ މަގާމުގައެވެ.
ކަސްޓަމްސްގެ އެންމެ އާދައިގެ ވަަޒީފާތަކުން ފެށިގެން އެ އިދާރާގެ އެކި މަގާމުތައް ފުރުއްވުމަށްފަހު ކަސްޓަމްސްގެ ކޮމިޝަނާ ޖެނަރަލްގެ މަގާމަށް ވަޑައިގެންނެވި ހަމައެކަނި ބޭފުޅަކީ ވެސް ޝަރީފް އެވެ.
ކަސްޓަމްސް އިން މިއަދު ބުނީ އެ އިދާރާގެ އެންމެ އިސްވެރިޔާގެ ގޮތުގައި ހުންނަވައިގެން ކަސްޓަމްސްގެ ހިދުމަތްތައް އިތުރަށް ތަރައްގީކޮށް ޒަމަނީކުރަން ޝަރީފް މުހިއްމު މަސައްކަތްތަކެއް ކުރެއްވި ކަމަށެވެ.