ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި އެމްޑީޕީގެ ޓިކެޓުގައި ވާދަކުރުމަށް ޝައުގުވެރިވާ ފަރާތްތަކުގެ މެދުގައި ބާއްވާ ޕްރައިމަރީއަށް ކުރިމަތިލުމަށް އިތުރު ވަގުތު ދީފި އެވެ.
އެމްޑީޕީގެ ޕްރައިމަރީގައި ވާދަކުރުމަށް ބޭނުންވާ ފަރާތްތަކަށް މިމަހުގެ 16 ވަނަ ދުވަހު އެ ޕާޓީން އެންމެ ފުރަތަމަ ފުރުސަތު ހުޅުވާލީ މިމަހުގެ 25 ވަނަ ދުވަހުގެ ނިޔަލަށެވެ. ނަމަވެސް މިއަދު ވަނީ ޕްރައިމަރީއަށް ކުރިމަތިލުމަށް މިމަހުގެ 30 ވަނަ ދުވަހުގެ ހަވީރު 4:00 އާ ހަމައަށް މުއްދަތު އިތުރުކޮށްފަ އެވެ.
އެމްޑީޕީން ބުނި ގޮތުގައި ޕްރައިމަރީ އޮންނާނީ ކުރިއަށް އޮތް ޖެނުއަރީ 26 އަދި 27 ވަނަ ދުވަހު އެވެ.
އެމްޑީޕީގެ ކުރީގެ ޕްރައިމަރީތަކާ ހިލާފަށް މި ފަހަރުގެ ޕްރައިމަރީގައި ވާދަކުރަން ހުށަހެޅޭނީ ކުށުގެ ރެކޯޑް ސާފުކުރުމަށްފަހު އެ ފޯމާވެސް އެކުގައެވެ.
އެމްޑީޕީގެ ޗެއާޕާސަންގެ ނައިބް އިބްރާހީމް ވަހީދު ވިދާޅުވީ މީގެ ކުރިން ކުށުގެ ރެކޯޑް ސާފުނުކޮށް ޕާޓީގެ ޕްރައިމަރީގައި ވާދަކުރަން ފުރުސަތު ދިނުމުން ޕްރައިމަރީ ކާމިޔާބުކުރާ ފަހުން ބައެއް ބޭފުޅުންގެ ކުށުގެ ރެކޯޑެއް އޮތްކަން އެނގި އިންތިހާބުގައި ވާދަނުކުރެވޭ ގޮތް ދިމާވެފައިވާ ކަމަށެވެ.
ޓިކެޓަށް ޝައުގުވެރިވާ މީހުންގެ ޝަރުތުތައް
- އެމްޑީޕީގެ މެމްބަރެއް ކަމުގައިވުން.
- ރައްޔިތުންގެ މަޖިލީހުގެ މެންބަރު ކަމަށް ކުރިމަތިލާ މީހުންގެ ޝަރުތުތައް ފުރިހަމަވުން
ރައްޔިތުންގެ މަޖިލީހުގެ އިންތިހާބު ބާއްވާނެ ތާރީހެއް ކަނޑައެޅުމުގައި އިލެކްޝަންސް ކޮމިޝަނާއި ރައްޔިތުންގެ މަޖިލިސް ވަނީ ހިޔާލުތަފާތު ވެފަ އެވެ.
އިލެކްޝަންސް ކޮމިޝަނުން ހުށަހަޅާފައިވަނީ ރޯދައިގެ ކުރިން އިންތިހާބު ބޭއްވުމަށެވެ. ނަމަވެސް ރައްޔިތުންގެ މަޖިލީހުން ހުށަހަޅަނީ ރޯދައިގެ ފަހުން އިންތިހާބު ބޭއްވުމަށެވެ.
އަންނަ އަހަރު ބާއްވާ ރައްޔިތުންގެ މަޖިލީހުގެ އިންތިހާބުގައި 93 ދާއިރާއަކަށް މެންބަރުން ހޮވުމަށް ހަމަޖެހިފައިވެ އެވެ.