ކްރިސްޓިއަނުން ފާހަގަކުރާ ކްރިސްމަސް ރާއްޖޭގައި މީހުން ދިރިއުޅޭ އެއްވެސް ރަށެއްގައި ފާހަގަކޮށްފިނަމަ ފިޔަވަޅު އަޅާނެ ކަމުގެ އިންޒާރު ފުލުހުން ދީފި އެވެ.
ފުލުހުން މިރޭ ނެރުނު ބަޔާނެއްގައި ބުނެފައިވަނީ އާ އަހަރާ ގުޅިގެން ކްރިސްޓިއަނުން ފާހަގަކުރަމުންދާ ކްރިސްމަސް ފާހަގަކުރުމަށް އެއްވެސް ހަރަކާތެއް މީހުން ދިރިއުޅޭ އެއްވެސް ރަށެއްގައި ކުރިއަށް ނުގެންދިއުމަށް އިލްތިމާސް ކުރާ ކަމަށެވެ.
ކްރިސްމަސް ފާހަގަކުރުމަކީ ރާއްޖޭގެ ގާނޫނުތަކާއި ގަވައިދުތަކުން މަނާ ކަމެއް ކަމަށްވެސް ފުލުހުންގެ ބަޔާނުގައި ވަނީ ހަނދާންކޮށްދީފަ އެވެ.
"ކްރިސްމަސް ފާހަގަކުރުމުގެ ގޮތުން ދިވެހިރާއްޖޭގެ މީހުން ދިރިއުޅޭ އެއްވެސް ރަށެއްގައި ހަރަކާތެއް ނުހިންގުމަށާއި މިފަދަ ހަރަކާތެއް ހިންގާ ފަރާތްތަކާ މެދު ގާނޫނީ އިމުގެ ތެރެއިން ފިޔަވަޅު އަޅާނެ ވާހަކަ ދަންނަވަމެވެ،" ބަޔާނުގައިވެ އެވެ.
ކްރިސްމަސް ފާހަގަނުކުރަން ކަމާ ގުޅޭ އިދާރާތަކުން ކޮންމެ އަހަރަކު އެންގި ނަމަވެސް ބައެއް ގެސްޓްހައުސްތަކުގައި ކްރިސްމަސް ފާހަގަކުރެ އެވެ.