ރައީސުލްޖުމްހޫރިއްޔާ ޑރ. މުހައްމަދު މުއިއްޒު، ޗައިނާގެ ރައީސް ޝީ ޖިންޕިންއާ މިއަދު ބައްދަލުކުރައްވައިފި އެވެ.
މިބައްދަލުކުރެއްވުމަށްފަހު ދެ ގައުމުގެ ދެމެދުގައި ރަސްމީ މަޝްވަރާތައްވެސް ކުރިއަށް ގެންގޮސްފައިވެ އެވެ.
މަޝްވަރާތަކުގައި ރައީސް މުއިއްޒު ވަނީ ރާއްޖެއަށް ބޭނުންވާ އިގްތިސާދީ އަދި ތަރައްގީގެ މަޝްރޫއުތަކުގައި ޗައިނާގެ އެހީތެރިކަމަށް އެދިވަޑައިގެންފަ އެވެ.
ރައީސް މުއިއްޒު ޗައިނާއަށް ކުރައްވަމުން ގެންދަވާ މި ދަތުރުފުޅަކީ ޝީގެ ދައުވަތަކަށް ކުރައްވާ ފުރަމަނާ ދަތުރުފުޅެކެވެ.
ޑރ. މުއިއްޒަކީ ޗައިނާގެ ރައީސް ކަމުގައި ހުންނަވައިގެން ޝީ ބައްދަލުކުރެއްވި ރާއްޖޭގެ ދެވަނަ ރައީސް އެވެ. އެމަނިކުފާނު ފުރަތަމަ ބައްދަލުކުރެއްވީ ކުރީގެ ރައީސް އަބްދުﷲ ޔާމީނާ އެވެ.
ރައީސްގެ އަރިހުގައި ދިވެހި ސަރުކާރުގެ މަތީ ފަންތީގެ ވަފްދެއްވެސް ބައިވެރިވެވަޑައިގަންނަވަ އެވެ.
ރައީސް މުއިއްޒު މިމަހުގެ ހަތްވަނަ ދުވަހު ޗައިނާއަށް ފެއްޓެވި ދަތުރުފުޅު ނިންމަވާލެއްވުމަށްފަހު ރާއްޖެ ވަޑައިގަންނަވަނީ މިމަހުގެ 12 ވަނަ ދުވަހު އެވެ.
ޗައިނާ އަކީ ރާއްޖޭގެ ތަރައްގީއަށް ވަރަށް މުހިއްމު އެހީތަކެއް އަބަދުވެސް ފޯރުކޮށްދޭ ގައުމެކެވެ.