ތ. ކަނޑޫދޫގައި 10 އަހަރުގެ ކުއްޖެއްގެ ގައިމައްޗަށް ފާރެއް ވެއްޓި އަނިޔާވެއްޖެ އެވެ.
ކަނޑޫދޫ އިން ވާހަކަދެއްކި މީހަކު ބުނީ މިކުއްޖާ އަނިޔާވީ އެ އުމުރުގެ އެހެން ކުދިންތަކަކާ އެކު ކުޅެން އުޅެނިކޮށް ކަމަށެވެ.
މައުލޫމާތު ދިން މީހާ އެ ކުއްޖާ އެ ވަގުތު ސަލާމަތް ކުރީވެސް އެކުގައި އުޅުނު ކުދިން ކަމަށާއި ނަމަވެސް ފަހުންބ ސިއްހީ މަރުކަޒަށް އެ ކުއްޖާ ގެންދިޔައީ އެހެން ބައެއް ކަމަށެވެ.
ވެއްޓުނު ފާރަކީ ގެއެއްގެ ވަށާފާރު ކަމަށާއި އެއީ ވަރަށް ދުވަސްވީ ފާރެއް ކަމަށްވެސް އޭނާ ބުންޏެވެ.
"ގާތްގަނޑަކަށް ހައެއްކަ ފޫޓޫ ހުންނަ މި ފާރު ވެއްޓި ކުއްޖާ އެކި ވަރުގެ އަނިޔާތައް ލިބިފައިވަނީ. ހަށިގަނޑުގެ އެކި ތަންތަން މަށައިގެންވެސް ގޮސްފައި ހުރީ،" އޭނާ ބުންޏެވެ.
ކަނޑޫދޫ ހޮސްޕިޓަލްގެ މުވައްޒަފަކު ބުނީ އަނިޔާވި ކުއްޖާގެ އެތެރެ ހަށީގެ ބައެއް ޓެސްޓްތައް ހެދުމަށް އެކަން ކުރެވޭ ވަރުގެ ހޮސްޕިޓަލަކަށް ފޮނުވުމުގެ މަސައްކަތް ކުރަމުންދާ ކަމަށެވެ. އޭނާ އިތުރަށް ބުނާ ކުއްޖާ ވާހަކަދައްކާ ކަމަށާއި ނަމަވެސް ވަރަށް ބޮޑަށް ތަދުވާތީ އުޅޭ ކަމަށެވެ.