ރައީސުލްޖުމްހޫރިއްޔާ ޑރ. މުހައްމަދު މުއިއްޒު، ތަރައްގީވަމުން އަންނަ ކުދި ޖަޒީރާ ގައުމުތަކުގެ ހަތަރުވަނަ ބައިނަލްއަގްވާމީ މަހާސިންތާގައި ބައިވެރިވެ ވަޑައިގަތުމަށް އެންޓީގާ އެންޑް ބާބިޔުޑާއަށް ކުރެއްވި ދަތުރުފުޅު ނިންމަވައިލެއްވުމަށްފަހު ރާއްޖެއަށް އެނބުރިވަޑައިގަތުމަށް ފަށްޓަވާފައިވާ ދަތުރުފުޅުގައި ބާބެޑޯސްގައި ޓްރާންސިޓް ކުރެއްވުމާ ގުޅިގެން އެ ގައުމުގެ ބޮޑުވަޒީރާއި އެ ގައުމުގެ ސަރުކާރުގެ ފަރާތްޕުޅުން ހާއްސަ މެހެމާންދާރީއެއް އަދާކުރައްވައިފި އެވެ.
ބާބެޑޯސް އަކީ ދުނިޔޭގައި އެންމެ މަޝްހޫރު ލަވަކިޔުންތެރިންގެ ތެރޭގައި ހިމެނޭ އަދި ބިލިއަނަރެއް ކަމަށްވާ ރިއާނާގެ އުފަން ގައުމެވެ.
ރައީސް މުއިއްޒަށް، ބާބެޑޯސްގެ ގްރާންޓްލޭ އެޑަމްސް އިންޓަނޭޝަނަލް އެއާޕޯޓުން މަރުހަބާ ދެންނެވީ، ބާބެޑޯސްގެ އެކްޓިން މިނިސްޓާ އޮފް ފޮރިންއެފެއާޒް އޮފް ފޮރިން އެންޑް ފޮރިން ޓްރޭޑް އަދި އެ ގައުމުގެ ރައްޔިތުންގެ މަޖިލީހުގެ މެންބަރު ސީ. ސަންދްރަވީ ހަޒްބަންޑްސް އާއި، ޗީފް އޮފް ޕްރޮޓޮކޯލް، މިސް ރެސާ ލޭން އެވެ.
ރައީސް މުއިއްޒު އާއި ދިވެހި ވަފްދުގެ ބޭފުޅުންނަށް އެއާޕޯޓް ސަރަހައްދުގައި ހުރި ބާބެޑޯސްގެ މުހިއްމު ރީތި އަދި ތާރީހީ ތަންތަން ދައްކައިލެއްވުމުގެ ހާއްސަ "ސައިޓްސީން"އެއް އެ ގައުމުގެ ސަރުކާރުން އިންތިޒާމުވެސް ކޮށްދެއްވި އެވެ. އަދި ބާބެޑޯސްގެ ބޮޑުވަޒީރު މިއާ އަމޮރް މޮޓްލީ ވަނީ ރައީސް މުއިއްޒަަށް ފޯނުން ގުޅުއްވައި، އެ މަނިކުފާނު އެ ގައުމުގައި މަޑުކޮށްލެއްވީތީ މަރުހަބާއާއި ޝުކުރު ދަންނަވާފަ އެވެ.
ރައީސް މުއިއްޒާއި، ބާބެޑޯސްގެ ބޮޑުވަޒީރު މިއާ އަމޮރް މޮޓްލީ ފޯނުން ދެއްކެވި ވާހަކަފުޅުގައި އެންޓީގާ އެންޑް ބާބިޔުޑާގައި ނިމިގެން މިދިޔަ، ތަރައްގީވަމުން އަންނަ ކުދި ޖަޒީރާ ގައުމުތަކުގެ ހަތަރުވަނަ މަހާސިންތާގެ ކާމިޔާބީތަކަށް އަލިއަޅުވައިލެއްވި އެވެ. އަދި މޫސުމަށް އަންނަ ބަދަލުތަކުން ކުދި ޖަޒީރާ ގައުމުތަކަށް ކުރާ ނޭދެވޭ އަސަރުން ރައްކާތެރިވުމަށް ބޭނުންވާ މާލީ އެހީތެރިކަން ހޯދުމަށް ކުދި ޖަޒީރާ ގައުމުތައް ގުޅިގެން މަސައްކަތްކުރުމާމެދުވެސް ދެބޭފުޅުން މަޝްވަރާކުރެއްވި އެވެ.
ރައީސް އޮފީހުން ބުނީ ބާބެޑޯސްގެ ބޮޑުވަޒީރު ދެއްކެވި ވާހަކަފުޅުގައި ނިމިގެން މިދިޔަ "ސިޑްސް"ގެ މަހާސިންތާގައި ރައީސް މުއިއްޒު އަދާކުރެއްވި މުހިއްމު ދައުރު ފާހަގަކުރައްވައި، ކުޑަވަގުތުކޮޅަކަށް ނަމަވެސް ޓްރާންސިޓްކޮށް ބާބެޑޯސްގައި މަޑުކޮށްލެއްވީތީ ވަރަށް އުފާކުރައްވާ ކަމުގައި ވިދާޅުވި ކަމަށެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވާހަކަފުޅު ނިންމަވައިލެއްވީ ބާބެޑޯސްގައި މި މަޑުކޮށްލެއްވި ކުޑަ ވަގުތުކޮޅު، އެ ގައުމުގެ ސަރުކާރުން ކަމޭހިއްތަވައި މެހެމާންދާރީ އަދާކުރެއްވި ފުރިހަމަކަމަށްޓަކައި އެމަނިކުފާނާއި ދިވެހި ވަފުދުގެ ހުރިހާ ބޭފުޅުންގެ ނަމުގައި ތަކުރާރުކޮށް ޝުކުރު އަދާކުރެއްވުމަށްފަހު އެވެ.
ރައީސް މުއިއްޒު، ބާބެޑޯސްއިން ފުރާވަޑައިގަންނަވަމުން އެ ގައުމުގެ ބޮޑުވަޒީރަށް ފޮނުއްވެވި ޝުކުރުގެ ހާއްސަ މެސެޖުގައި ބާބެޑޯސްގައި މަޑުކޮށްލެއްވި މި ކުޑަ ވަގުތުކޮޅުގައިވެސް އެ ގައުމުން ފެނިވަޑައިގަތް ރީތިކަމަށް ތައުރީފް ކުރައްވާފައިވެ އެވެ. އަދި ރައީސުލްޖުމްހޫރިއްޔާއާއި އެމަނިކުފާނުގެ އަރިހުގައި ވަޑައިގަތް ވަފުދަށް، ބާބެޑޯސްގެ ބޮޑުވަޒީރާއި އެ ގައުމުގެ ސަރުކާރުގެ ފަރާތުން އަދާކުރެއްވި ހާއްސަ މެހެމާންދާރީ އަބަދުވެސް ހަނދުމަފުޅު ހުންނާނެ ކަމުގައި ވިދާޅުވެފައިވެ އެވެ.
ރައީސްގެ މި މެސެޖުގައި އެންޓީގާ އެންޑް ބާބިޔުޑާގައި ނިމިދިޔަ މަހާސިންތާގެ ހަވާސާގައި ބާބެޑޯސްގެ ބޮޑުވަޒީރާއި ބައްދަލުކުރެއްވުމަށް މިދިޔަ އަންގާރަ ދުވަހަށް ތާވަލުކުރައްވާފައި އޮތް ނަމަވެސް ދެބޭފުޅުންގެވެސް އަވަދިނެތިވެ އަދި ވަރަށް ބުރަކޮށް އުޅުއްވަން ޖެހިވަޑައިގަތުމުގެ ސަބަބުން އެ ބައްދަލުވުން ބޭއްވުމުގެ ފުރުސަތު ލިބިވަޑައި ނުގަތްކަން ހިތާމައާއެކު ފާހަގަކުރައްވައި، ވަރަށް އަވަހަށް ދެބޭފުޅުން ބައްދަލުވާނެ ކަމުގެ އުއްމީދު ކުރައްވާ ކަމަށްވެސް ވިދާޅުވި އެވެ.
ރައީސްގެ މެސެޖު ނިންމަވާލައްވާފައިވަނީ "ސިޑްސް"ގެ ހަތަރުވަނަ މަހާސިންތާގައި ބައިނަލްއަގްވާމީ މާލީ އެހީތެރިކަމުގެ ނިޒާމު އިސްލާހުކޮށް، ކުދި ޖަޒީރާ ގައުމުތަކަށް ވެދޭ މާލީ އެހީ އިތުރުކުރުމަށް ބާރުއަޅުއްވައި ބާބެޑޯސްގެ ބޮޑުވަޒީރު ކުރެއްވި މަސައްކަތްޕުޅު ހާއްސަ ގޮތެއްގައި ފާހަގަކުރައްވާފަ އެވެ. އަދި އެކަމަނާގެ އެ މަސައްކަތްޕުޅުގެ ސަބަބުން ވަރަށް ބޮޑު ހިތްވަރެއް ލިބިވަޑައިގެންނެވި ކަމުގައި ވިދާޅުވެ ރާއްޖެއިންވެސް ވަކާލާތުކުރާ އެންމެ މުހިއްމު އެއް ކަމަކީ އެއީ ކަމުގައި ވިދާޅުވެފައިވެ އެވެ. އަދި އެންޓީގާ އެންޑް ބާބިޔުޑާގައި މި ބޭއްވުނު މަހާސިންތާގެ ނިންމުންތައް ތަންފީޒުކުރުމުގައި ރާއްޖެއާއި ބާބެޑޯސް އިން އެއްބާރުލައިގެން، މި މަސައްކަތް ކުރަމުން ގެންދެވޭނެ ކަމަށް އުއްމީދު ކުރައްވާ ކަމަށްވެސް ވިދާޅުވެފައިވެ އެވެ.