ޔޫރޯ ފުޓްބޯޅަ މުބާރާތުގައި މިރޭ ކުޅުނު މެޗުގައި ތުރުކީ އަތުން 3-0 ގެ ބޮޑު ތަފާތަކުން މޮޅުވެ ޕޯޗުގަލް އިން މުބާރާތުގެ ގަދަ 16 އިން ޖާގައެއް ޔަގީންކޮށްފި އެވެ.
ޕޯޗުގަލްއަށް ގްރޫޕު ސްޓޭޖުގައި އަދި ބާކީ އެއް މެޗު އޮއްވައި، ގަދަ 16 އިން ފުރުސަތު ހޯދީ ގްރޫޕްގެ އެއްވަނަ ޓީމުގެ ގޮތުގަ އެވެ.
މިރޭގެ ނަތީޖާއާ އެކު ޕޯޗުގަލް އިން މިވަނީ މިމުބާރާތުގައި ކުޅުނު ދެ މެޗުން ވެސް މޮޅުވެފަ އެވެ.
ޕޯޗުގަލްގެ އިތުރުން ފުރަތަމަ ދެ މެޗަށް ފަހު ގަދަ 16 އިން ފުރުސަތު ހޯދީ ޖަރުމަނާއި ސްޕެއިން އެވެ.
ގްރޫޕް އެފްގެ އެއްވަނައިގައި ޕޯޗުގަލް އޮތީ ހަ ޕޮއިންޓާ އެކު އެވެ. ދެވަނައިގައި އޮތް ތުރުކީ އަށް ތިން ޕޮއިންޓް ލިބިފައިވާއިރު، ތިންވަނައިގައި އޮތް ޗެކް ރިޕަބްލިކާއި ހަތަރެއްގައި އޮތް ޖޯޖިއާ މިރޭ އެއްވަރުވިއިރު، އެ ދެ ޓީމަށް ވެސް ވަނީ ޕޮއިންޓެއް ލިބިފަ އެވެ.
މިރޭ ކުޅުނު މެޗުގައިވެސް ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯއަށް ގޯލެއް ޖެހޭގޮތެއް ނުވި އެވެ. ކުރީ މެޗުގައިވެސް އޭނާއަށް ގޯލެއް ނުޖެހުނެވެ.
ގިނަ ބަޔަކު އަންނަނީ ރޮނާލްޑޯގެ ގޯލަކަށް އިންތިޒާރު ކުރަމުންނެވެ.
ރޮނާލްޑޯ ވަނީ މިރޭގެ މެޗުގައި މޮޅު ކުޅުމެއް ދައްކާފަ އެވެ. ގޯލެއް ނުޖެހުނަސް ރޮނާލްޑޯ ވަނީ ބޯޅައާއެކު މުޅިން ހުސްކޮށް ތުރުކީގެ ޕެންލްޓީ އޭރިއާގެ ތެރެއަށް ވަދެ އެޓީމުގެ ބުރޫނޯ ފެނާންޑޭޒްއަށް ބޯޅަ ދީގެން އޭނަ ލައްވާ ގޯލް ޖަހުފާ އެވެ.
ޕޯޗުގަލްއަށް ބްރޫނޯ ފެނާންޑެޒްގެ އިތުރުން ގޯލު ޖަހައިދިނީ ބާނާޑޯ ސިލްވާ އެވެ. ދެން ޖެހި ގޯލަކީ ތުރުކީގެ ޑިފެންޑަރު ބައިކޮޅަށް ޖެހި ގޯލެކެވެ. މި ގޯލަކީ ތުރުކީގެ ސަމެޓް އަކޭދިން އެ ޓީމުގެ ކީޕަރަށް ޖައްސާލި ބޯޅަ ގޯލު ތެރެއަށް ވަދެގެން ބައިކޮޅަށް ވަތް ގޯލެކެވެ. މިއީ މިމުބާރާތުގައި ބައިކޮޅަށް ވަތް ގޯލުގެ ތެރެއިންވެސް އެންމެ އާދަޔާހިލާފް ގޯލް އެވެ.