ކ. ހިންމަފުށި ޑިޓޭންޝަން ސެންޓަރުގައި އަލުން ޑްރަގް އޮފެންޑާސް ރިމާންޑް ސެންޓަރު ހުޅުވައިފި އެވެ.
ޑްރަގު ރިހިބިލިޓޭޝަން ޕްރޮގްރާމުތައް މިހާރުވެސް މި ސެންޓަރުގައި ހިންގަ އެވެ. މިވަގުތު މިތަނުގައި ހިދުމަތް ދެނީ ހަތް މީހަކަށެވެ.
ހޯމްލޭންޑް މިނިސްޓްރީން ބުނީ މި ސެންޓަރުގައި ނެޝަނަލް ޑްރަގް އެޖެންސީ (އެންޑީއޭ)ގެ ދަށުން ސެކިއުރިޓީ ބަލަހައްޓާނީ ފުލުހުން ކަމަށެވެ.
ރާއްޖޭގައި މަސްތުވާތަކެތީގެ މައްސަލަ ބޮޑު ވެފައިވާއިިރު ރާއްޖޭގައި ޑްރަގު ރިހިބިލިޓޭޝަން ސެންޓަރު ގާއިމުކޮށް ހިންގުމަށް ބޭނުންވާ އަމިއްލަ ފަރާތްތަކަށް ސަރުކާރުން އެ ފުރުސަތު ވަނީ މިދިޔަ ޖެނުއަރީ މަހު ހުޅުވާލާފަ އެވެ. މި ފުރުސަތުގައި ދުނިޔޭގެ ބައެއް ގައުމުތަކުގައި ޑްރަގު ރިހިބިލިޓޭޝަން ސެންޓަރުތައް ގާއިމުކޮށް ހިންގަމުންދާ މެލޭޝިއާގެ ކުންފުންޏަކުން ވަނީ ޝައުގުވެރިކަން ފާޅުކޮށްފަ އެވެ.
ރާއްޖޭގައި މަސްތުވާތަކެތި ބޭނުންކުރާ މީހުންގެ އަދަދު 8،000 މީހުންނާ ގާތްކުރާނެ ކަމަށް ތަފާސްހިސާބުތަކުން ދައްކަ އެވެ. އެހެންވެ މިއީ ގައުމީ ސަލާމަތާ ގުޅިފައިވާ ކަމެއް ކަމަށް މިސަރުކާރުން ގަބޫލުކުރާތީ އެންޑީއޭ ވަނީ ހޯމްލޭންޑް ސެކިއުރިޓީ މިނިސްޓްރީގެ ދަށަށް ބަދަލުކޮށްފަ އެވެ. ނިމިދިޔަ ސަރުކާރުގައި އެންޑީއޭ ކުރިން ހިންގަމުން ގެންދިޔައީ ހެލްތު މިނިސްޓްރީގެ ދަށުންނެވެ.