ވެލާނާ އިންޓަނޭޝަނަލް އެއާޕޯޓް (ވީއައިއޭ)ގައި މިއަދު ޖެއްސީ އިޓަލީގެ އަސްކަރީ އުޅަނދުތަކެއް ކަމަށާއި އެއީ ހުއްދަ ނަގައިގެން ޖެއްސި އުޅަނދުތަކެއް ކަމަށް ސަރުކާރުން ބުނެފި އެވެ.
އަވަސްއާ މިރޭ ވާހަކަދެއްކެވި ސަރުކާރުގެ އޮފިޝަލަކު ވިދާޅުވީ ވީއައިއޭ އަށް މިއަދު ޖެއްސީ އިޓަލީގެ އަސްކަރީ ހަތަރު ފައިޓާ ޖެޓާއި ކާގޯ ބޯޓެއް ކަމަށެވެ. އަންނަ ހުކުރު ދުވަހާ ހަމައަށް މި އުޅަނދުތައް ވީއައިއޭގެ ސަރަހައްދުން ފެންނާނެ ކަމަށްވެސް ވިދާޅުވި އެވެ.
"މިއުޅަނދުތައް ވީއައިއޭގައި ޖެއްސީ ހަމަޖެހިފައިވާ އުސޫލުތަކުގެ ތެރެއިން ހޯދަންޖެހޭ ހުއްދަތައް ހޯދައިގެން ދުރާލާ އަންގައިގެން،" އޭނާ ވިދާޅުވި އެވެ.
އޮފިޝަލް އިތުރަށް ވިދާޅުވީ އިޓަލީގެ އަސްކަރީ އުޅަނދުތައް ވީއައިއޭގައި ޖައްސަނީ އެހެން ގައުމެއްގައި ކުރިއަށްދާ އަސްކަރީ ހަރަކާތްތަކެއްގައި ބައިވެރިވުމަށްފަހު ޓްރާންސިޓް ކޮށްލުމުގެ ގޮތުން ކަމަށެވެ. އެ ވަގުތު ބައެއް ފަހަރު މި އުޅަނދުތައް ތެޔޮ އަޅާނެ ކަމަށްވެސް ބުންޏެވެ.
އިޓަލީގެ އަސްކަރީ އުޅަނދުތައް މިދިޔަ އަހަރުގެ އޮގަސްޓް އެއްވަނަ ދުވަހުވެސް ވީއައިއޭގައި ޖައްސާފައިވެ އެވެ.