ފުރަން ހަމަޖައްސާފައިވާ ވަގުތުގެ ތިން ގަޑިއިރު ކުރިން ވެލާނާ އިންޓަނޭޝަނަލް އެއާޕޯޓް (ވީއައިއޭ) އަށް ދިއުމަށް އެއާޕޯޓް ހިންގާ މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން އެދިއްޖެ އެވެ.
އެމްއޭސީއެލް އިން މި ގޮތަށް އެދުނީ އުމްރާއަށް ދާ މީހުންނާއެކު އެއާޕޯޓުގެ މަގުތަކާއި ޓާމިނަލް ބާރުބޮޑުވާނެތީ އެވެ.
އެހެންކަމުން ފުރުމުގެ ތިން ގަޑިއިރު ކުރިން އެއާޕޯޓަށް ގޮސް، އެއާޕޯޓްގެ މުވައްޒަފުންގެ އިރުޝާދުތަކާ އެއްގޮތަށް އަމަލުކުރުމަށް ވަނީ އެދިފަ އެވެ.
މިއީ ސްކޫލު ޗުއްޓީ ދުވަސްވަރަށްވުމުން ގިނަ ބަޔަކު ދަނީ ރަށްރަށާއި ރާއްޖެއިން ބޭރަށް ދަތުރުކުރަމުންނެވެ.
މީގެ އިތުރުން މިއީ ފަތުރުވެރިކަމުގެ ޕީކް ސީޒަނަށްވުމުން ރާއްޖެ ޒިޔާރަތްކުރާ ފަތުރުވެރިންގެ އަދަދުވެސް ވަނީ މި ދުވަސްވަރު އިތުރުވެފަ އެވެ. އެގޮތުން މިހާރު އެވަރެޖްކޮށް ދުވާލަކު 6،000 އަށްވުރެ ގިނަ ފަތުރުވެރިން ރާއްޖެ ޒިޔާރަތްކުރެ އެވެ.