ވެލާނާ އިންޓަނޭޝަނަލްގެ އެއާޕޯޓް (ވީއައިއޭ)ގެ ޓާމިނަލްގެ އާ އިމާރާތް ކުރިންވެސް ތާވަލްކޮށްފައި އޮތް ގޮތަށް އަންނަ އަހަރުގެ މެދުތެރޭ ހުޅުވާނެ ކަމަށް މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް)ގެ މެނޭޖިން ޑިރެކްޓަރު އިބްރާހިމް ޝަރީފް މުހައްމަދު ވިދާޅުވެއްޖެ އެވެ.
ރައްޔިތުންގެ މަޖިލީހުގެ އެސްއޯއީ ކޮމެޓީގައި ވާހަކަދައްކަވަމުން ޝަރީފް ވިދާޅުވީ މިއަހަރު ނިމުމުގެ ކުރިން ޓާމިނަލް ހުޅުވަން ކުރިން މަސައްކަތް ކުރި ނަމަވެސް ޓާމިނަލްގެ މަސައްކަތް އަދި މުޅިން ނުނިމޭ ކަމަށެވެ. އެކަމަކު މިހާރު ނިމިފައި ހުރި ބައި އަންނަ އަހަރުގެ ތެރޭގައި އޮޕަރޭޝަނަށް ގެނެވިދާނެ ކަމަށް ވިދާޅުވި އެވެ.
ޝަރީފް ވިދާޅުވީ ޓާމިނަލް މުޅިން ނުނިމި ފަތުރު ވެރިކަމުގެ ހައިސީޒަންގައި އެ ތަން ހުޅުވާލުމަކީ ކުރަން ރަނގަޅު ކަމެއް ނޫން ކަމަށް އެއާލައިންތަކުގެ ބައިނަލްއަގްވާމީ ޖަމިއްޔާ އިން ލަފާދީފައިވާ ކަމަށެވެ. އެކަމަކު އަންނަ އަހަރުގެ ޖޫން ނޫނީ ޖުލައިގައި އާ ޓާމިނަލް ހުޅުވުމަށް ނިންމާފައިވާ ކަމަށްވެސް ވިދާޅުވި އެވެ.
ޝަރީފް ވިދާޅުވީ ގޮންޖެހުންތަކެއް ހުރި ނަމަވެސް ޓާމިނަލްގެ މަސައްކަތް ކުރިއަށް ދަނީ ތާވަލާ އެއްގޮތަށް ކަމަށެވެ.
"ޓާމިނަލްގެ މަސައްކަތްތައް ދަނީ ތާވަލާ އެއްގޮތަށް. އަދި މިހާ ހިސާބަށް އައިއިރު މަސައްކަތުގެ 85 ޕަސެންޓް މަސައްކަތް ވަނީ ނިމިފައި. އެމްއޭސީއެލް އިން މަސައްކަތް ކުރަމުންދަނީ ކޮންޓްރެކްޓަރާއި ވަރަށް ގާތުން،" ޝަރީފް ވިދާޅުވި އެވެ.
ވީއައިއޭގައި މިހާރު ހަދަމުންދާ ޓާމިނަލާކީ އަހަރަކު ހަތް މިލިއަން މީހުންނަށް ހިދުމަތް ދެވޭ ގޮތަށް 78،000 އަކަމީޓަރުގެ ބޮޑު ޓާމިނަލެކެވެ.