ޔުނައިޓެޑް އަރަބް އެމިރެޓްސް (ޔޫއޭއީ) ގެ އެއާ އަރަބިއާގެ ޝެޑިއުލް ދަތުރުތައް ރާއްޖެއަށް މިއަދު ފަށައިިފި އެވެ.
ވެލާނާ އިންޓަނޭޝަނަލް އެއާޕޯޓު (ވީއައިއޭ) ގައި ޝެޑިއުލް ދަތުރުތައް ރާއްޖެއަށް ފެށުމަށް މިއަދު ބޭއްވި ރަސްމިއްޔާތުގައި އެއާ އަރަބިއާގެ ފުރަތަމަ ފްލައިޓަށް ވަނީ ވޯޓާ ސެލިއުޓެއް އަރުވާފަ އެވެ.
ރަސްމިއްޔާތުގައި އެމްއޭސީއެލް އަދި އެމްއެމްޕީއާރްސީގެ އިސްވެރިން ވަނީ ފްލައިޓުން އައި ފަތުރުވެރިންނަށް މަރުހަބާ ކިޔުއްވާފަ އެވެ.
މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) އިން ބުނީ މި ދަތުރުތައް ރާއްޖެއަށް ފެށުމުގެ ސަބަބުން ރާއްޖެ އަންނަ މެދު އިރުމަތީގެ ފަތުރުވެރިންގެ އަދަދު އިތުރުވެގެންދާނެ ކަމަށެވެ.
އޭއާ އަރަބިއާއިން މި ދަތުރުތައް ކުރާނީ އެއާބަސް އޭ-320 މަރުކާގެ ބޯޓުތަކުގައެވެ.
ރާއްޖެއަށް ސީދާ ދަތުރުތައް ފެށުމާ ބެހޭ ގޮތުން އެ އެއާލައިންގެ ޗީފް އެގްޒެކެޓިވް އާދިލް އަލް އަލީ ވިދާޅުވީ ރާއްޖެފަދަ މަގުބޫލު މަންޒިލަަކަށް ސީދާ ދަތުރުތައް ފެށުމަކީ ލިބޭ ބޮޑު އުފަލެއް ކަމަށެވެ.
"މިއީ މިފަދަ މަންޒިލުތަކަށް ފަސޭހައިން ދަތުރުކުރެވޭނެ ނިޒާމުތައް ހަމަޖައްސައިދިނުމަށް ކުރާ މަސައްކަތުގެ ނަތީޖާއެއް،" އާދިލް ވިދާޅުވި އެވެ.