އިނގިރޭސިވިލާތުގެ އާންމު އިންތިހާބު އިދިކޮޅު ލޭބަ ޕާޓީން ކާމިޔާބު ކުރުމާ ގުޅިގެން ރައީސް ޑރ. މުހައްމަދު މުއިއްޒު މަރުހަބާ ވިދާޅުވެއްޖެ އެވެ.
ރައީސް މުއިއްޒު އެކްސްގައި ކުރެއްވި ޕޯސްޓެއްގައި ވަނީ އިންތިހާބުގައި ލޭބަ ޕާޓީން ހޯދި ކާމިޔާބީއަށް އަދި ކައިރި މުސްތަގުބަލެއްގައި އިނގިރޭސި ބޮޑުވަޒީރަކަށް ވެވަޑައިގަންނަވާނެ ލޭބަ ޕާޓީގެ ލީޑަރު ކީރު ސްޓޯމާއަށް މަރުހަބާ ވިދާޅުވެފަ އެވެ.
ރައީސް މުއިއްޒު ވިދާޅުވީ ލޭބަ ޕާޓީގެ ވެރިކަމެއްގައި އަދި ކީރު ސްޓޯމާގެ ޒައާމަތުގައި އިނގިރޭސިވިލާތަށް ތަނަވަސްކަމުގެ އާ ފަތިހެއް ފެންނާނެ ކަމަށެވެ.
"ދިވެހި ސަރުކާރާއި ދިވެހި ރައްޔިތުންގެ ނަމުގައި ހެޔޮއެދުންތައް އަރިސްކޮށް، ދެ ގައުމުގެ ދެމެދުގައި މިހާރު އޮތް ގާތް ގުޅުން އިތުރަށް ބަދަހިކުރައްވާނެ ކަމަށް އުއްމީދުކުރަން،" ރައީސް ވިދާޅުވި އެވެ.
ރައީސް މުއިއްޒު އިތުރަށް ވިދާޅުވީ ދުނިޔެއަށް މިވަގުތު ހުރި ގޮންޖެހުންތައް ހައްލުކުރުމަށް ގާތުން މަސައްކަތް ކުރައްވާނެ ކަމުގައިވެސް ވިދާޅުވި އެވެ.
އިނގިރޭސިވިލާތުގައި މިދިޔަ ބުރާސްފަތި ދުވަހު ބޭއްވި އާންމު އިންތިހާބަށްފަހު ލޭބަ ޕާޓީއަށް އިނގިރޭސިވިލާތުގައި ވެރިކަން ކުރަން ފުރުސަތު މި ލިބުނީ 2010 އިން ފެށިގެން ކޮންޒަވޭޓިވް ޕާޓީން ކުރަމުން އައި ވެރިކަން 14 އަހަރަށް ފަހު ނިމުމުންނެވެ.