ގަވާއިދާ ހިލާފަށް އުޅޭ ބިދޭސީންތަކެއް ހުޅުމާލޭގެ ފުރަތަމަ ފިޔަވަހީގައި ވިޔަފާރި ކުރަމުން ދަނިކޮށް ހައްޔަރުކޮށްފި އެވެ.
މޯލްޑިވްސް އިމިގްރޭޝަނުން ބުނި ގޮތުގައި މި ބިދޭސީންތައް ހައްޔަރުކޮށްފައިވަނީ އިއްޔެ ހިންގި "ޖޮއިންޓް ޓާސްކް ފޯސް" އެއްގަ އެވެ. މި އޮޕަރޭޝަންގައި އިމިގްރޭޝަންގެ އޮފިސަރުންގެ އިތުރުން ފުލުހުންވެސް ހަރަކާތްތެރިވި އެވެ.
މި އޮޕަރޭޝަންތަކުގައި އަށް ބިދޭސީއަކު ހައްޔަރުކޮށްފައިވާ ކަމަށްވެސް އިމިގްރޭޝަނުން ބުނެ އެވެ.
އިމިގްރޭޝަނުން ބުނި ގޮތުގައި މި ބިދޭސީންތައް ހައްޔަރުކުރީ ހުޅުމާލޭގެ ފުރަތަމަ ފިޔަވަހީގައި ޓޭކްއަވޭ ކޮފީ ވިޔަފާރިތައް ހިންގަމުންދަނިކޮށެވެ.
![](https://images-01.avas.mv/post/big_30n5xuGjXwBewmLiW8KvX4ccD.jpg)
ގަވާއިދާ ހިލާފަށް އުޅޭ ބިދޭސީންތަކެއް ހުޅުމާލޭގެ ފުރަތަމަ ފިޔަވަހީގައި ވިޔަފާރި ކުރަމުން ދަނިކޮށް ހައްޔަރުކޮށްފައިވާއިރު ގަވާއިދާ ހިލާފަށް އުޅޭ ބިދޭސީން ހޯދުމަށް ފުލުހުންނާއި އިމިގްރޭޝަން ގުޅިގެން މިދިޔަ މަހު މާލޭގައިވެސް އޮޕަރޭޝަނެއް ހިންގާފައިވެ އެވެ.
އެ ގޮތުން މިދިޔަ މަހު މާލޭގައި ހިންގި އޮޕަރޭޝަނެއްގައި މާލޭގެ ލޯކަލް މާރުކޭޓާއި މާލެ ތެރޭގައި ހަދާފައި ހުރި ބައެއް މާރުކޭޓުތަކުގައި ގަވާއިދާ ހިލާފަށް އުޅުނު 50 ބިދޭސީން ހޯދާ ވަނީ އިމިގްރޭޝަނާ ހަވާލުކޮށްފަ އެވެ.
ރާއްޖޭގައި ގަވާއިދާ ހިލާފަށް އުޅޭ އަންހެން ބިދޭސީން ހޯދުމަށް އިމިގްރޭޝަންގެ އަންހެން އޮފިސަރުންވެސް މިދިޔަ މެއި މަހުގެ ތެރޭގައި ހާއްސަ އޮޕަރޭޝަނެއް ކުރިއަށް ގެންގޮސްފައިވެ އެވެ.