ހުޅުމާލޭގެ އިމާރާތެއްގެ ތެރޭގައި ގަވައިދާ ހިލާފަށް މަސައްކަތް ކުރަމުން ދިޔަ 22 ބިދޭސީއަކު އިމިގްރޭޝަން ބެލުމުގެ ދަށަށް ގެނެސްފި އެވެ.
މި އިމާރާތަށް އިމިގްރޭޝަންގެ އޮފިސަރުން ރޭގެ ވަގުތެއްގައި ވަދެފައިވަނީ ސޯޝަލްމީޑިއާގައި ކަންބޮޑުވުން ފާޅުކޮށް ހިއްސާކޮށްފައިވާ މައުލޫމާތަކާ ގުޅިގެން ކަމަށް އިމިގްރޭޝަނުން މައުލޫމާތު ދެއެވެ.
އިމިގްރޭޝަނުން ބުނީ ތިން ބުރީގެ މިއިމާރާތުގައި ކާބޯތަކެތީގެ ވިޔަފާރިކުރަމުން ދިޔަ ކަމަށެވެ.
މި ތަނަކީ ދިވެހި އަންހެނަކާ ކައިވެނިކޮށްގެން އުޅޭ ބިދޭސީ ފިރިހެނަކާއި ގުޅުން އޮތް ތަނެއް ކަމަށްވެސް އިމިގްރޭޝަނުން ބުންޏެވެ.
"މި މައްސަލަ އިމިގްރޭޝަނުން ދަނީ މިހާރު ތަހުގީގުކުރަމުން. މިއީ މިހާތަނަށް ހުޅުމާލޭގައި ހިންގުނު އެންމެ ބޮޑު އެއް އޮޕަރޭޝަން،" އިމިގްރޭޝަނުން ބުނެފައިވެ އެވެ.
މާލޭގައި މިދިޔަ ބުރާސްފަތި ދުވަހުގެ ރޭ ހަތަރު ތަނެއް ބަލައި ފާސްކޮށް ގަވައިދާ ހިލާފަށް އުޅުނު 16 ބިދޭސީ އަކު ވެސް އިމިގްރޭޝަންގެ ބެލުމުގެ ދަށަށް ގެންގޮސްފައިވެ އެވެ.
ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގެންނެވި ފަހުން މިހާތަނަށް ގާނޫނާއި ގަވައިދާ ހިލާފަށް އުޅުނު 2،000 އަށް ވުރެ ގިނަ ބިދޭސީން ވަނީ ރާއްޖެއިން ޑިޕޯޓްކޮށްލާފަ އެވެ.