ވިސާ ނެތި ރާއްޖޭގައި ދިރިއުޅެމުންދާ ފްރާންސްގެ އާއިލާ ރާއްޖެއިން ފޮނުވާލުމަށް ނިންމާފައިވާ ކަމަށް އިމިގްރޭޝަން ކޮންޓްރޯލަރު މުހައްމަދު ޝަމްއާން ވިދާޅުވެއްޖެ އެވެ.
ފްރާންސްގެ އާއިލާއެއް ވިސާ ނެތި ރާއްޖޭގައި އުޅެމުންދާ 12 އަހަރު ވެފައިވާ ކަމަށް ބުނެ ނޫހަކުން މިއަދު ވަނީ އެ މައްސަލަ ފެންމަތިކޮށްފަ އެވެ.
މިއާއިލާ މިވަގުތު އުޅެމުންދަނީ ތ. ވޭމަންޑޫގައި އެ ރަށުން ގެއެއް ކުއްޔަށް ނަގައިގެންނެވެ.
އިމިގްރޭޝަން ކޮންޓްރޯލަރު މުހައްމަދު ޝަމްއާން ވަހީދު މިއަދު ސޯޝަލްމީޑިއާގައި ކުރެއްވި ޕޯސްޓެއްގައި ވިދާޅުވީ
އިމިގްރޭޝަން ގާނޫނާ ހިލާފަށް ރާއްޖޭގައި އުޅެމުން ދިޔަ ފްރާންސަށް ނިސްބަތްވާ ހަ މީހުންގެ އާއިލާއެއްގެ މައުލޫމާތު އެ އިދާރާއަށް މިދިޔަ ޖުލައި 18 ވަނަ ދުވަހު ލިބިފައިވާ ކަމަށެވެ.
މި މައުލޫމާތު އިމިގްރޭޝަނަށް ލިބިފައިވަނީ ރާއްޖޭގައި ގަވައިދާ ހިލާފަށް އުޅޭ ބިދޭސީންގެ މައްސަލަތައް ރިޕޯޓް ކުރުމަށް އޮންނަ "އިމިގްރޭޝަން ވޮޗް" ޕޯޓަލްގެ ތެރެއިންނެވެ.
ޝަމްއާން ވިދާޅުވީ ފްރާންސް އާއިލާގެ މައުލޫމާތު ލިބުމާ ގުޅިގެން އެ މައްސަލަ އިމިގްރޭޝަނުން ބެލުމަށްފަހު މިދިޔަ އޮކްޓޫބަރު 23 ވަނަ ދުވަހު މައްސަލައިގައި ހިމެނޭ އިސްފަރާތް އިމިގްރޭޝަނަށް ހާޒިރުކޮށްފައިވާ ކަަމަށެވެ. އަދި އެ މީހުންގެ ޕާސްޕޯޓުގެ މުއްދަތު ހަމަވެފައިވާތީ، ފްރާންސްގެ އާއިލާ ރާއްޖެއިން ފުރުވާލުމަށް ބޭނުންވާ ޓްރެވަލް ޑޮކިއުމަންޓް ހޯދުމުގެ މަސައްކަތް ފޮރިން މިނިސްޓްރީއާއި ގުޅިގެން ކުރަމުންދާ ކަމުގައިވެސް ވިދާޅުވި އެވެ.
"މި ފަރާތްތަކުގެ ޓްރެވަލް ޑޮކިއުމަންޓް ލިބުނުހާ އަވަހަށް ފުރުވާލުމަށް ވަނީ ހަމަޖެހިފައި. އިމިގްރޭޝަން ގާނޫނާ ހިލާފަށް ދިވެހިރާއްޖޭގައި އުޅުމަށް އެއްވެސް ފަރާތަކަށް ފުރުސަތެއް ނުދެވޭނެ،" ޝަމްއާން ވިދާޅުވި އެވެ.