މާލޭގައި ބަނގުރާ ވިއްކާ ކަމަށް ތުހުމަތު ކުރެވޭ ސްރީލަންކާގެ ދެ މީހަކު ޑީޕޯޓްކުރުމުގެ މަސައްކަތް ފަށައިފި އެވެ.
ފުލުހުން ބުނީ އެ އިދާރާގެ ކައުންޓާ ނާކޮޓިކްސް އިންޓެލިޖެންސަށް ލިބުނު މައުލޫމާތަކާ ގުޅިގެން މާލޭގައި ހިންގި އޮޕަރޭޝަނެއްގައި ހެންވޭރު ގެއެއް ބަލައި ފާސްކޮށް ލަންކާގެ ދެ މީހަކު ހައްޔަރުކޮށްފައިވާ ކަމަށެވެ.
މި އޮޕަރޭޝަނުގައި ހައްޔަރުކޮށްފައިވަނީ ޕައްޓި ވިތަނަލަގެ ވިމޯޝާ ވިނަތަގެ (27 އަހަރު) އަދި ނުރުކުޝަން ކަވިންދަ ސިންގަޕުރަގެ (21 އަހަރު) ކިޔާ މީހެކެވެ.
ފުލުހުން ބުނީ މި މަހުގެ ފަސްވަނަ ދުވަހު ހިންގި މި އޮޕަރޭޝަނުގައި އެ މީހުން ދިރިއުޅޭ ގެ ކޯޓު އަމުރެއްގެ ދަށުން ބަލައި ފާސްކުރިއިރު ބަނގުރާ ކަމަށް ބެލެވޭ އެއްޗެއް ހުރި 500 އެމްއެލްގެ 116 ފުޅިއާއި ފަސް ލީޓަރުގެ ހަ ފުޅި ފެނިފައިވާ ކަމަށެވެ.
މި މައްސަލައާ ގުޅިގެން ހައްޔަރުކުރި ދެ މީހުން ޑީޕޯޓް ކުރުމަށް އިމިގްރޭޝަނާ ހަވާލުކުރި ނަމަވެސް އިމިގްރޭޝަނުން ނިންމި ގޮތެއް އެ އިދާރާ އިން އަދި ނުބުނެ އެވެ.