ދިރާގުން ބައިނަލްއަގްވާމީ ސީ-މީ-ވީ 6 ސަބްމެރިން ކޭބަލް ސިސްޓަމް ރާއްޖޭގައި އިފްތިތާހްކޮށްފި

ދިރާގުން އެންމެ ފަހުގެ ގްލޯބަލް ސުޕަ ހައިވޭ ކަމަށްވާ ބައިނަލްއަގްވާމި ސީ-މީ-ވީ 6 ސަބްމެރިން ކޭބަލް ދިވެހިރާއްޖޭގައި އިފްތިތާހުކޮށްފި އެވެ.

މިއީ ރާއްޖޭގެ މުވާސަލާތީ ތާރީހުގައި ބައިނަލްއަގްވާމީ ސަބްމެރިން ކޭބަލް ސިސްޓަމް ކޮންސޯޓިއަމްގެ ފުރިހަމަ މެންބަރެއްގެ ގޮތުގައި ރާއްޖޭގެ ޑިޖިޓަލް ހިދުމަތް ދޭ ކުންފުންޏެއް ބައިވެރިވާ ފުރަތަމަ ފަހަރެވެ.

ސީ-މީ-ވީ 6 ސަބްމެރިން ކޭބަލް ސިސްޓަމަކީ ދެކުނު އިރުމަތީ އޭޝިއާ، މެދުއިރުމަތި އަދި ހުޅަނގު ޔޫރަޕް ގުޅުވާލަދޭ ގްލޯބަލް ސުޕަރ-ހައިވޭ އެކެވެ.

އެންމެ ފަހުގެ ކަނޑުއަޑީގެ ކޭބަލް ޓެކްނޮލޮޖީން ފަރުމާކޮށްފައިވާ މި ސިސްޓަމް ސިންގަޕޫރުން ފެށިގެން ފަރަންސޭސިވިލާތާ ދެމެދު އެގާރަ ގައުމެއްގައި ޖައްސާނެ އެވެ. ދިގުމިނުގައި 19،200 ކިލޯމީޓަރު ހުންނަ މި ސަބްމެރިން ކޭބަލް ސިސްޓަމްގެ ޓްރާންސްމިޝަން ސްޕީޑް ފަށާނީވެސް 100 ޓީބީޕީއެސް އިންނެވެ.

މި ގްލޯބަލް ސިސްޓަމްގެ ފުރިހަމަ ބައިވެރިއަކަށްވުމަށްޓަކައި ދިރާގުން ވަނީ 2021 ވަނަ އަހަރު ބައިނަލްއަގްވާމީ 16 ޓެލްކޯ އަދި ޓެކް ކުންފުންޏެއް ޝާމިލްވާ ކޮންސޯޓިއަމެއްގައި ބައިވެރިވެފަ އެވެ. އެގޮތުން ދިރާގުން މި ކުރި ބޮޑު އިންވެސްޓްމަންޓުގެ ސަބަބުން ދުނިޔޭގެ މުހިއްމު އިންޓަނެޓް އެކްސްޗޭންޖް ޕޮއިންޓްތަކާއި ޑޭޓާ ސެންޓަރުތަކާއި ދިވެހިރާއްޖެ ސީދާ ގުޅުވާލެވި، ރާއްޖޭގެ ބައިނަލްއަގްވާމީ ކަނެކްޓިވިޓީ އިތުރަށް ހަރުދަނާވެގެންދާނެ އެވެ.

މީގެ އިތުރުން ކަސްޓަމަރުންނާއި ވިޔަފާރިތަކަށް ފޯރުކޮށްދޭ ހިދުމަތްތަކުގެ ފެންވަރު މިހާރަށްވުރެ ރަނގަޅުވެ، މުސްތަގުބަލުގައި ރާއްޖޭގެ އެކި ކަންކޮޅުތަކުގައި ޑިޖިޓަލް ހިދުމަތްތައް މިހާރަށްވުރެ ކުރިއެރުމަށް މަގުފަހިވެގެންދާނެ އެވެ.

ސީ-މީ-ވީ 6 ސަބްމެރިން ކޭބަލް ރާއްޖޭގައި ރަސްމީކޮށް އިފްތިތާހުކޮށްފައިވަނީ ހުޅުމާލޭ ދެވަނަ ފިޔަވަހީގައި މިއަދު ބޭއްވި ހާއްސަ ރަސްމިއްޔާތެއްގަ އެވެ.

މި ރަސްމިއްޔާތު ޝަރަފުވެރިކޮށްދެއްވީ މިނިސްޓާ އޮފް ސިޓީސް، ލޯކަލް ގަވަރުމަންޓް އެންޑް ޕަބްލިކް ވާކްސް އާދަމް ޝަރީފް އުމަރު އެވެ. ސަރުކާރުގެ ފަރާތުން ހާއްސަ ދައުވަތު އެރުވި ބޭފުޅުންވެސް މި ރަސްމިއްޔާތުގައި ބައިވެރިވެވަޑައިގެންފައިވެ އެވެ.

މިރަސްމިއްޔާތުގައި މިނިސްޓަރު އާދަމް ޝަރީފް ވިދާޅުވީ ދިރާގަކީ އަބަދުވެސް ރާއްޖޭގެ ޑިޖިޓަލް މާހައުލު ކުރިއަރުވާ އިންގިލާބި ބަދަލުތައް ގެނައުމުގެ އެންމެ ކުރީ ސަފުގައި ހަރަކާތްތެރިވަމުންދާ ކުންފުންޏެއް ކަމަށެވެ. ދިރާގުން ދަނީ ދިވެހި ރައްޔިތުން ގައުމީ އަދި ބައިނަލްއަގްވާމީ ފެންވަރުގައި މުވާސަލާތީ ގޮތުން ގުޅުވާދެމުން ކަމަށްވެސް ފާހަގަކުރެއްވި އެވެ. އެގޮތުން މިއަދު އިފްތިތާހުކުރެވިގެން މިދިޔަ ސީ-މީ-ވީ 6 ސަބްމެރިން ކޭބަލްއާ އެކު ދުނިޔޭގެ އެކި މައި އިންޓަނެޓް އެކްސްޖޭންޖް ޕޮއިންޓްތަކަށް ރާއްޖެއަށް އެކްސެސް ލިބޭނެ ކަމަށާއި މީގެސަބަބުން އެއްވެސް ގައުމަކަށް ބަރޯސާ ނުވެ، ދުނިޔޭގެ ޑިޖިޓަލް ނެޓްވާކާއި ރާއްޖެއާ ސީދާ ގުޅުވާލެވޭނެ ކަމުގައިވެސް ވިދާޅުވި އެވެ.

"މި ފުރުސަތުގައި ދުނިޔޭގެ އިންޓަނެޓް ސުޕަ ހައިވޭއާ ރާއްޖެ ގުޅުވާލައި، އަޅުގަނޑުމެންގެ މުވާސަލާތީ ވިއުގަ ހަރުދަނާކޮށް، ރާއްޖޭގެ އިގްތިސާދީ އަދި އިޖުތިމާއީ ތަރައްގީ ކުރިއެރުވުމުގައި ދިރާގުން ކުރަމުންދާ ގައުމީ މަސައްކަތަށް އެކުންފުންޏަށް ޝުކުރު އަދާކުރަން،" މިނިސްޓަރު ވިދާޅުވި އެވެ.

މިރަސްމިއްުޔާތުގައި ދިރާގުގެ ސީއީއޯ އަދި މެނޭޖިން ޑިރެކްޓަރު އިސްމާއީލް ރަޝީދު ވިދާޅުވީ ރާއްޖޭގެ ގުޅުމުގެ ހައިސިއްޔަތުން، ދިރާގުގެ އަމާޒަކީ ދުނިޔޭގެ އެކި ކަންކޮޅުތަކުގައި ހިންގަމުންދާ ޑިޖިޓަލް ޓްރާންސްފޮމޭޝަނާ އެއްވަރަށް ރާއްޖޭގައި ދިރިއުޅޭ ރައްޔިތުންނަށްވެސް އެންމެ ފަހުގެ ޓެކްނޮލޮޖީ ފޯރުކޮށްދިނުން ކަމަށެވެ. ދިރާގުގެ ޑިޖިޓަލް ނެޓްވާކް ސީ-މީ-ވީ 6 ސަބްމެރިން ކޭބަލް ސިސްޓަމާ ގުޅާލުމަކީ ދުނިޔޭގެ ފެންވަރުގެ ޑިޖިޓަލް ހަބެއްގެ ގޮތުގައި ރާއްޖެ ގާއިމުކޮށް، ދިރާގުގެ މުވާސަލާތީ ވިއުގަ އިތުރަށް ވަރުގަދަ ކުރުމަށް އެޅޭ މުހިއްމު ފިޔަވަޅެއް ކަމުގައިވެސް ވިދާޅުވި އެވެ.

"މިއީ މިފަދަ ގޮތަކަށް ރާއްޖޭގެ ކޭބަލް ބައިނަލްއަގްވާމީ ސިސްޓަމަކާ ސީދާ ގުޅާލެވޭ ފުރަތަމަ ފަހަރު. މިއާ އެކު ރާއްޖޭގެ ޑިޖިޓަލް ކަނެކްޓިވިޓީގެ ސްޕީޑް އިތުރަށް ހަލުވިވެ، ލޭޓެންސީ ކުޑަވެ، މުސްތަގްބަލުގައި ދިރާގުގެ އިންޓަނެޓް ހިދުމަތުގެ އަގުތަކަށް ހެޔޮ ބަދަލުތަކެއް އަންނާނެ،" އިސްމާއީލް ވިދާޅުވި އެވެ.

ސީ.މީ.ވީ 6 ސަބްމެރިން ކޭބަލް ސިސްޓަމްގެ މަސައްކަތް 2026 ވަނަ އަހަރުގެ ކުރީކޮޅުގައި ނިމޭނެ ކަމަށް ދިރާގުން ބުނެ އެވެ.

ދިރާގުން ދަނީ ރާއްޖޭގެ ޑިޖިޓަލް އިންގިލާބު ކުރިއަރުވާ، ޑިޖިޓަލް މުޖުތަމައުތައް ބާރުވެރިކުރުވައި، ރާއްޖޭގައި ދިރިއުޅޭ ރައްޔިތުންގެ ދިރިއުޅުން އިތުރަށް ފާގަތިކުރުމަށް މަސައްކަތް ކުރަމުން ކަމަށްވެސް އެ ކުންފުނިން ބުނެފައިވެ އެވެ.