ކަރަންޓް ބިލް ބޮޑުވެފައިވާ ގެތަކުގައި ބިލް ބޮޑުވި ގޮތް ބެލުމަށް އޮޑިޓެއް ހެދުމަށް ސްޓެލްކޯ އިން ނިންމައިފި އެވެ.
ނޫސްވެރިންނާ މިއަދު ބައްދަލުކުރައްވާ ސްޓެލްކޯގެ މެނޭޖިން ޑިރެކްޓަރު ހުސައިން ފަހްމީ ވިދާޅުވީ މާލޭގެ ހަ ޕަސަންޓް އަދި ހުޅުމާލޭގެ 15 ޕަސަންޓް ގޭބިސީގައި މިދިޔަ މަހު ވެސް ކަރަންޓް ބިލް ބޮޑުވެފައިވާ ކަމަށް ފާހަގަކުރެވިފައިވާ ކަމަށެވެ. އެހެންވެ ސްޓެލްކޯގެ މުވައްޒަފުން އެފަދަ ގޭގެއަށް ގޮސް ބިލް ބޮޑުވާ ސަބަބުތައް ހޯދާނެ ކަމަށް ވިދޅާުވި އެވެ.
"އެ ތަންތަނުގައި ބޭނުން ކުރަނީ ކޮން ކޮން އާލާތްތަކެއްތޯ، އެޕާޓްމެންޓްގެ އިންސިއުލޭޝަން ހުރީ ކިހިނެތްތޯ ބަލާނަން،" ފަހްމީ ވިދާޅުވި އެވެ.
އޭނާ ވިދާޅުވީ ކަރަންޓް ރީޑިން ނެގުމުގައި އޮޅުވާލުމެއް ނޫޅޭނެ ކަމުގެ ޔަގީންކަން ދޭ ކަމަށެވެ. އެހެންވެ ގޭބިސީތަކެއްގެ ކަރަންޓް ބިލް މިދިޔަ މަހު ބޮޑު ސަބަބެއް އެނގުން ސްޓެލްކޯއަށްވެސް މުހިއްމު ކަމުގައި ވިދާޅުވި އެވެ.
ފަހްމީ އިތުރަށް ވިދާޅުވީ ސްޓެލްކޯ އިން އޮޑިޓް ހަދަން ދާ ގެތައް ނޫން އެހެން ގެއަކުންވެސް އޮޑިޓެއް ހަދަން ބޭނުންވާނަމަ އެކަން އަންގާލުމުން ސްޓެލްކޯ އިން އެ ގެއަކަށް ގޮސް ދިމާވާ މައްސަލަތައް ބަލާނެ ކަމަށެވެ.
މާލެ ސަރަހައްދުގައި 70،000 ގޭބިސީއަށް ސްޓެލްކޯ އިން ކަރަންޓްގެ ހިދުމަތް ދޭއިރު މި އަހަރުގެ އެންމެ ޕީކް ގަޑިތަކުގައި 113 މެގަވޮޓަށް ގޭބިސީތަކުގައި ކަރަންޓް ބޭނުންކޮށްފައިވެ އެވެ. އަންނަ އަހަރުގެ ތެރޭގައި ޕީކް ގަޑިތަކުގައި މިއަދަދު 120 މެގަވޮޓަށް އަރާނެ ކަމަށް ބަލައި ސްޓެލްކޯ އިން ދަނީ އެކަމަށް ތައްޔާރުވަމުންނެވެ.