ރައްޔިތުންގެ މަޖިލީހުގެ މެންބަރުން އަދަދު ހިފެހެއްޓުމަށް ވެރިކަން ކުރާ ޕީއެންސީ އިން މަޖިލީހަށް ހުށަހަޅާފައިވާ ގަރާރަށް ބައެއް ހިޔާލުތަކާ އެކު ސިޔާސީ ޕާޓީތަކުން ތާއީދުކޮށްފި އެވެ.
ގާނޫނުއަސާސީ މިހާރު އޮތް ގޮތުން އާބާދީގެ ކޮންމެ 5،000 އަށް މީހަކަށް މެންބަރެއް އިންތިހާބު ކުރަންޖެހޭތީ މަޖިލީހަށް މެންބަރުން ހޮވާ ކޮންމެ ފަހަރަކު އިތުރު މެންބަރުންތަކެއް އިންތިހާބު ކުރަންޖެހުމަކީ ދައުލަށް މާލީ ބޮޑު ބުރަޔަކަށް ވަނީ ވެފަ އެވެ.
މިމައްސަލަ ހައްލުކުރުމަށްޓަކައި މެންބަރުންގެ އަދަދު ވަކި އަދަދެއްގައި ހިފެހެއްޓުމަށް ބާރުއެޅުމުގެ ގޮތުން މަޖިލީހަށް ގަރާރެއް ހުށަހެޅުއްވީ ޕީއެންސީގެ ބާރަށު ދާއިރާގެ މެންބަރު އިބްރާހީމް ޝުޖާއު އެވެ.
މި ގަރާރު ދިރާސާ ކުރަމުންދާ މިނިވަން މުއައްސަސާއަށް ބައެއް ސިޔާސީ ޕާޓީތަކުގެ އިސް ބޭފުޅުން ހާޒިރުވެ އެ ޕާޓީގެ ހިޔާލު ހުރި ގޮތް ވަނީ ހިއްސާކުރައްވާފަ އެވެ. އެގޮތުން ކޮމިޓީއަށް މިއަދު ހާޒިރުވީ ދަ ޑިމޮކްރެޓްސް، އެމްއާރްއެމް، އަދާލަތު ޕާޓީ، އެމްއެންޕީ އަދި އެމްޑީއޭގެ ބޭފުޅުންނެވެ. ކޮމިޓީގެ ބައްދަލުވުމުގައި ބައިވެރިވުމަށް ރައީސް އަބްދުﷲ ޔާމީންގެ ޕާޓީ -- ޕީއެންއެފްއަށް ވެސް ދައުވަތު ދިން ކަމަށް މަޖިލީހުން ބުންޏެވެ. ނަމަވެސް އެ ޕާޓީގެ އެއްވެސް ބޭފުޅަކު ކޮމިޓީއަށް ހާޒިރުވެފައެއް ނުވެ އެވެ.
ދަ ޑިމޮކްރެޓްސްގެ ނައިބް ރައީސް އައިޝަތު އަލައިކާ ވިދާޅުވީ މެންބަރުން އަދަދު އިތުރުވުމަކީ ދައުލަތަށް އޮތް ބުރައަކަށްވާތީ އެ އަދަދު ހިފަހައްޓަންޖެހޭ ކަމަށެވެ. އެހެންވެ އޭނާ ހުށަހެޅުއްވީ ކޮންމެ އަތޮޅަކަށް ވަކި އަދަދަކަށް މެންބަރުން އިންތިހާބު ކުރުމާއެކު ކޮންމެ ސިޔާސީ ޕާޓީއެއް މަޖިލީހުގައި ތަމްސީލް ކުރެވޭ ގޮތް ހެދުމަށެވެ.
އެމްއާރްއެމްގެ ރައީސް އަދި ކުރީގެ މަޖިލިސް މެންބަރު ފާރިސް މައުމޫން ވިދާޅުވީ މެންބަރުން އަދަދު ހިފެހެއްޓުމަށް އެ ޕާޓީން އަބަދުވެސް ތާއީދުކުރާ ކަމަށެވެ. ފާރިސް ހުށަހެޅުއްވީ މަޖިލީހުގެ މެންބަރުންގެ ޖުމްްލަ އަދަދަށް ބަދަލު ނާންނާނެހެން މަޖިލިސް ބައިކެމަރަލް ތަނަކަށް ހަދާށެވެ. އޭރުން މަޖިލީހުގައި މަތި ގެއަކާއި ދަށު ގެއެއް އޮންނާނެ އެވެ.
ފާރިސް ވިދާޅުވީ މަޖިލީހުގައި މިހާރު ހިމެނޭ 93 މެންބަރުން އަދަދަކީ ވެސް ބޮޑު އަދަދެއް ކަމަށްވާއިރުވެސް އެ އަދަދުގައި މެންބަރުންގެ އަދަދު ހިފެހެއްޓުމަށް ބައެއް ބޭފުޅުން ވަކާލާތު ކުރައްވާ ކަމަށެވެ. އެކަމަކު އޭރުން މިހާރު ތިއްބެވި މެންބަރުން މަސްލަހަތު އެކަމުގައި ހިމެނޭ ކަމަށް ބެލުމުގެ ފުރުސަތު އެބައޮތް ކަމަށެވެ. ފާރިސްގެ ވާހަކަ ހުރި ގޮތުން އޭނާ ތާއީދުކުރައްވަނީ 93 މެންބަރުންނަށް ވުރެ ވެސް މަދުން މެންބަރުން ތިއްބެވުމަށް ކަމަށް މާނަކުރެވެ އެވެ.
ފާރިސް ވަނީ މަޖިލިސް ތެރެއިން ފަންނީ ބޭފުޅުންނާއި އަންހެން ބޭފުޅުންނަށް ކޯޓާއެއް ހާއްސަކުރަންވެސް ހުށަހަޅުއްވާފަ އެވެ. މީގެއިތުރުން މެންބަރުން ހޮވާއިރު ބޮޑެތި އާއިލާތަކަށް ބައެއް ދާއިރާތަކުގައި ނުފޫޒު ފޯރުވޭ ގޮތެއް ހުރިކަން ފާހަގަކުރައްވާ ފާރިސް ވަނީ އެކަމަށްވެސް ރިއާޔަތް ކުރެއްވުމަށް އެދިވަޑައިގެންފަ އެވެ.
އަދާލަތު ޕާޓީގެ ރަޖިސްޓްރާ އާދަމް މުހައްމަދު ވިދާޅުވީ ރައްޔިތުންގެ މަޖިލީހުގެ މެންބަރުން އަދަދު ކަނޑައަޅާ ގޮތް ކޮންމެ 10 އަހަރަކުން އެއް ފަހަރު ރިވިއުކުރާ ގޮތަށް އޮތުމަށް އެ ޕާޓީން ތާއީދުކުރައްވާ ކަމަށެވެ. އަދާލަތުންވެސް ވަނީ އަންހެން ބޭފުޅުންނަށް ވަކި އަދަދަކަށް ކޯޓާ ކަނޑައެޅުމަށް ހުށަހަޅާފަ އެވެ. މީގެއިތުރުން ނުކުޅެދޭ މީހުންނަށްވެސް މަޖިލީހުން ފުރުސަތެއް ދިނުން މުހިއްމު ކަމުގައި ވިދާޅުވި އެވެ.
ކޮމިޓީ ބައްދަލުވުމުގައި އެމްއެންޕީން ތާއީދު ކުރީ މަޖިލީހުގެ މެންބަރުންގެ އަދަދު 77 އަކަށް ދަށްކުރުމަށެވެ. ނަމަވެސް އެމްޑީއޭ އިން ބުނީ މަޖިލީހުގައި މިހާރު ހިމެނޭ 93 ދާއިރާ އޮތުމުން އެ އަދަދަށް ބަދަލު ނާންނާހެން މެންބަރުންގެ އަދަދު ހިފެހެއްޓުމަށް ތާއީދުކުރައްވާ ކަމަށެވެ.