ރައްޔިތުންގެ މަޖިލީހުގެ ދައުރުން ބޭރު ޖަލްސާތަކެއް މިމަހު ބާއްވަން ނިންމައިފި އެވެ.
މަޖިލީހުގެ ދައުރުން ބޭރު ޖަލްސާތަކެއް ބާއްވަން ނިންމިކަން ޕީއެންސީގެ މަޖިލިސް މެންބަރަކު ވަނީ އަަވަސް އަށް ޔަގީންކޮށްދީފަ އެވެ.
ދައުރުން ބޭރު ޖަލްސާ ބާއްވަން ނިންމާފައިވަނީ މިމަހުގެ 16 އަދި 20 ވަނަ ދުވަހު ކަމަށް މެންބަރު ވިދާޅުވި އެވެ.
މެންބަރު ވިދާޅުވި ގޮތުގައި މި ޖަލްސާތައް ބާއްވަނީ މިނިވަން މުއައްސަސާތަކަށް މެންބަރުން އައްޔަން ކުރުމުގެ މަސައްކަތް ހިމެނޭ ގޮތަށް އިތުރު ބައެއް މަސައްކަތްތައް ނިންމުމަށެވެ.
މަޖިލީހުގެ ދައުރުން ބޭރު ޖަލްސާތަކެއް ބާއްވާއިރު މިނިސްޓްރީ އޮފް ހައުސިން، ލޭންޑް އެންޑް އާބަން ޑިވެލޮޕްމަންޓް އުވާލައި، އެ މިނިސްޓްރީގެ ބައެއް މަސައްކަތްތައް އެހެން މިނިސްޓްރީތަކުގެ ދަށަށް ބަދަލުކޮށް އެ މިނިސްޓްރީތަކުގެ ޕޯޓްފޯލިއޯތަކަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ މިދިޔަ ޑިސެމްބަރު މަހު ބަދަލު ގެންނަވާފަ އެވެ.
މިއާއެކު މިނިސްޓްރީތަކުގެ ޕޯޓްފޯލިއޯތަކަށް ގެނައި ބަދަލު ރައްޔިތުންގެ މަޖިލީހުން ފާސްކޮށް މިނިސްޓްރީތަކަށް އަލަށް އައްޔަންކުރި ވަޒީރުންނަށް ރައްޔިތުންގެ މަޖިލީހުން ރުހުން ހޯދަން ޖެހޭނެ އެވެ.
މީގެ އިލެކްޝަންސް ކޮމިޝަނާއި ބްރޯޑްކާސްޓިން ކޮމިޝަނަށް މެންބަރުން އައްޔަން ކުރުމުގެ މަސައްކަތް މަޖިލީހުގެ މިދިޔަ ދައުރު ނިމުނުއިރު އޮތީ ނުނިމި އެވެ.