ގޭގެ ސިޓިން ރޫމްގައި ޕަބްޖީ ކުޅެން އޮތް އުމުރުން 18 އަހަރު ނުވާ އަންހެން ކުއްޖަކާ ބެހުނު، އެ ކުއްޖާގެ ޅިޔަނެއް 15 އަހަރަށް ޖަލަށްލާން ހުކުމްކޮށްފި އެވެ.
މީގެ ދުވަސްކޮޅެއް ކުރިން މެދު ރާއްޖެތެރޭ ރަށެއްގައި ހިނގި މި ހާދިސާގައި އުމުރުން 18 އަހަރު ނުވާ އަންހެން ކުއްޖަކަށް ޖިންސީ ގޯނާކޮށްފައިވަނީ އެ ކުއްޖާގެ ތިމާގެ މީހެއްގެ ފިރިމީހާ އެވެ.
މި މީހާގެ މައްޗަށް ދައުލަތުން އުފުލާފައިވަނީ އިތުބާރު ކުރެވޭ މަގާމެއްގައި ހުރި މީހަކު ކުޑަ ކުއްޖަކަށް ޖިންސީ ގޯނާ ކުރުމުގެ ކުށުގެ ދައުވާއެވެ.
މި މައްސަލައިގެ ތަހުގީގުގައި އެ ފިރިހެން މީހާ ވަނީ އެ މީހާ އެކަން ކުރި ކަމަށް ކުރެވޭ ތުހުމަތުތަކަށް އިންކާރުކޮށްފަ އެވެ. ޝަރީއަތުގައިވެސް އޭނާ ވަނީ އޭނާ އެކަން ކުރިކަމަށް ކުރާ ތުހުމަތުތަކަށް އިންކާރުކޮށްފަ އެވެ. އެހެންކަމުން މައްސަލަ ސާބިތުކޮށްފައިވަނީ މިހާރު 18 އަހަރު ފުރިފައިވާ އެ އަންހެން ކުއްޖާގެ ވާހަކަތަކާއި އަދި މައްސަލައާއި ގުޅިގެން ހުށަހަޅާފައިވާ ހެއްކާއި ގަރީނާތަކުގެ އަލީގައެވެ.
މި ހަބަރުގައި ކުޑަ ކުއްޖާއަށް ޖިންސީ ގޯނާ ކުރި މީހާގެ ވަނަވަރު އެނގިދާނެ އެއްވެސް މައުލޫމާތެއް ހިއްސާކޮށްފައި ނުވަނީ އަނިޔާ ލިބުނު ކުޑަ ކުއްޖާގެ މަސްލަހަތު ގައެވެ.
މީގެ ދުވަސްކޮޅެއް ކުރިން އުތުރުގެ ރަށެއްގައިވެސް ކުޑަ ކުއްޖަކާ ބެހުނު މީހަކަށް ބޮޑު ހުކުމެއް އިއްވާފައިވެ އެވެ.