ޖަރުމަނު ސަރަހައްދުގައި އެމެރިކާއިން ބަހައްޓާ މިސައިލްތައް ގޮވާނީ ޖަރުމަނުގެ އަމިއްލަ ބުރަކައްޓަށް ކަމަށް އެ ގައުމުގެ ސިޔާސީ ލީޑަރެއް ކަމަށްވާ ޒާހާ ވާގަންކްނެޗް ވިދާޅުވެއްޖެ އެވެ.
ޒާހާ ވިދާޅުވި ގޮތުގައި ރަޝިއާއިން އިންޒާރުދިފައި އޮއްވައި ޖަރުމަނުގައި މިސައިލް ބަހައްޓަށް އެމެރިކާއަށް ހުއްދަދިނުމަކީ ނުރައްކާ ބޮޑު ކަމެއް ކަމަށެވެ. އަދި ރަޝިއާގެ ނިއުކްލިއާ މިސައިލްތަކުގެ އަމާޒަކަށް ޖަރުމަނު ނުވާނެ އެއްވެސް ގޮތެއް ނޯންނާނެ ކަމަށް އޭނާ ވިދާޅުވި އެވެ.
މި އަހަރު ޖުލައިގައި ވޮޝިންގްޓަންގައި އޮތް ނޭޓޯ ސަމިޓްގައި އެމެރިކާއިން ވަނީ ބޮޑު އިއުލާނެއްކޮށްފަ އެވެ.
އެ އިއުލާނުގައި އޮތް ގޮތުން ޖަރުމަނުގެ ފަސްގަނޑުގައި ޓޮަމަހޯކް ކްރޫޒް މިސައިލާއި ހައިޕާސޮނިކް މިސައިލް އަދި ދުރު ރާސްތާ މިސައިލްތައް އެމެރިކާއިން ބަހައްޓާނެ އެވެ.
އެމެރިކާ އާއި ޖަނުމަނުން ވަނީ ދިފާއީ އެއްބާރުލުން ވަރުގަދަކުރުމަށް އެއްބަސްވެފައި ކަމަށްވެސް ބަޔާނުގައިވެ އެވެ.
ޖަރުމަނުގައި ބަހައްޓަނީ ގައުމެއް ދިފާއުކުރަން ބަހައްޓާ ފެންވަރުގެ މިސައިލްތަކެއް ނޫން ކަމަށް ޒާހާ ވިދާޅުވި އެވެ. އެއީ ބަޔަކު ފަނާކުރަން ބަހައްޓާ މިސައިލްތަކެއް ކަމަށް ވެސް އޭނާ ވިދާޅުވި އެވެ.
އެމެރިކާގެ މި އިއުލާނާ ގުޅިގެން ރަޝިއާއިން ވެސް ވަނީ އިންޒާރުގެ ބަޔާނެއް ނެރެފަ އެވެ. ރަޝިއާގެ ސަލާމަތަށް ނުރައްކާ އޮތް ކަމަށް ފެނިއްޖެ ނަމަ، ނިއުކްލިއާ ހަތިޔާރު ބޭނުންކުރާނެ ކަމަށް ރަޝިއާ އިން ބުނެ އެވެ.
ޖަރުމަނުގެ ސިޔާސީ ލީޑަރުންގެ ތެރެއިން ބައެއް މީހުން ގަބޫލުކުރާ ގޮތުގައި، ޖަރުމަނުގެ ސަރަހައްދުތަކުގައި ދުރު ރާސްތާ މިސައިލް ބެހެއްޓުމަކީ މައްސަލައެއް ނޫނެވެ. އެއީ ބޭރު ގައުމެއްގެ ނުރައްކަލުން ޖަރުމަނު ރައްކާތެރިކުރުމަށް ކޮންމެހެން ކުރަން ޖެހޭ ކަމެއް ކަމަށްވެސް އެ މީހުން ބުނެ އެވެ.
ރަޝިއާގައި ހުރި ނިއުކްލިއާ މިސައިލްތަކުގެ ބޯކޮޅު މިހާރުވެސް ހުރީ ޔޫރަޕަށް ކަމަށް ސަރުކާރާ އެއްކޮޅު ސިޔާސީ ލީޑަރުން ބުނެ އެވެ. ޔޫރަޕަށް ހަމަލާދޭން ދުރު ރާސްތާ މިސައިލްތައް ރަޝިއާއަށް ބޭނުންކުރެވޭއިރު، އެފަދަ މިސައިލްތައް ޖަރުމަނުގައި ނުބެހެއްޓެންވީ ސަބަބެއް ނެތް ކަމަށްވެސް ބައެއް މީހުން ބުނެ އެވެ.