ރާއްޖެއަށް މަސްތުވާތަކެތި އެތެރެކުރާ މީހުންނަށް މަރުގެ އަދަބު ދެވޭ ގޮތަށް މަސްތުވާތަކެއްޗާ ބެހޭ ގާނޫނަށް ގެންނަ އިސްލާހު ޑްރާފްޓްކޮށްފި އެވެ.
މަސްތުވާތަކެއްޗާ ބެހޭ ގާނޫނުގައި މިހާރު އޮންނަނީ ރާއްޖެއަށް މަސްތުވާތަކެތި އެތެރެ ކުރާ މީހުން އެއްލައްކަ ރުފިޔާ އާއި 10 މިލިއަން ރުފިޔާއާ ދެމެދުގެ އަދަދަކުން ޖުރިމަނާކޮށް އުމުރަށް ޖަލަށްލާ ގޮތަށެވެ.
ހޯމްލޭންޑް ސެކިއުރިޓީ މިނިސްޓްރީން މިހާރު ޑްރާފްޓް ކޮށްފައިވާ ބިލްގައި އޮތީ ބިލްގެ ޖަދުވަލު އެކެއްގައިވާ މަސްތުވާއެއްޗެއް ވަކި އަދަދަކަށް ވުރެ ގިނައިން ރާއްޖެ އެތެރެކޮށްފިނަމަ މަރުގެ އަދަބުދޭ ގޮތަށެވެ.
މިބިލް މުޅިން ނިންމާލުމަށްފަހު ވަރަށް އަވަހަށް އެޓާނީ ޖެނަރަލްގެ އޮފީހަށް ފޮނުވަން ހޯމްލޭންޑް ސެކިއުރިޓީ މިނިސްޓްރީން ދަނީ ތައްޔާރުވަމުންނެވެ.
ރާއްޖޭގައި މިވަގުތު މަރުގެ އަދަބު ކަނޑައެޅިފައިވާ ހަމައެކަނި ކުށަކީ ގަސްދުގައި މީހަކު މަރައިފި ކަމަށް ސާބިތުވާ ހާލަތެވެ.
ރާއްޖޭގައި 1953 ވަނަ އަހަރުގެ ފަހުން މަރުގެ ހުކުމެއް ތަންފީޒުކޮށްފައެއް ނުވެ އެވެ.