ނ. މަނަދޫގައި އަނިޔާވެރިކޮށް މަރާލާފައި އޮއްވާ ފެނުނު އެރަށު އަންނާރުމާގެ، ނައީމާ މޫސާގެ މަރުގެ ފަހަތުގައި ހުރީ އެ މައްސަލައިގައި ދައުވާ ލިބޭ ތިން މީހުންގެ ތެރެއިން ހުސައިން ފަވާޒު ކަމަށް ދައުލަތުން މިއަދު ބުނެފި އެވެ.
މި މައްސަލައިގައި ފަވާޒާއި، އަހުޒަމް އަބްދުއްޝަކޫރާއި، އަބްދުލްވާހިދު ރިފާސްގެ މައްޗަށް ދައުވާ އުފުލާފައިވާއިރު ތިން މީހުންގެ މައްޗަށްވެސް ދައުވާ އިއްވުން މިއަދު ވަކިވަކިން ކުރިއަށްދެ އެވެ.
އެގޮތުން އެ ތިން މީހުންގެ މައްޗަށްވެސް އުފުލާފައިވަނީ ތޫނު އެއްޗެއް ބޭނުންކޮށްގެން ގަސްދުގައި މީހަކު މަރާލުމުގެ ދައުވާއާއި އަދުލު އިންސާފު ގާއިމުކުރުމަށް ހުރަސްއެޅުމުގެ ދައުވާއާއި، މައްޔިތާގެ ބޭނުން ނަހަމަ ގޮތުގައި ހިފުމުގެ ދައުވާ އެވެ.
އެ ތިން ދައުވާއަށް ފަވާޒު އިންކާރުކޮށްފައިވީ ނަމަވެސް ދައުލަތުގެ ވަކީލު ޝަރީއަތުގައި ވިދާޅުވީ އަހުޒަމާއި ރިފާސްއަށް ނައީމާއަކީ ސިހުރު ހަދާ މީހެއް ކަމަށް ފަވާޒު ވިސްނައިދިން ކަމަށާއި އޭނާ މަރާލާނެ ގޮތުގެ އިރުޝާދު ދިނީ ވެސް ފަވާޒު ކަމަށެވެ.
ވަކީލު ވިދާޅުވި ގޮތުގައި ފަވާޒު ވަނީ ސިހުރު ހަދާ މީހުން މަރާލުމުން ފާފައެއް ނުވާނެ ކަމަށް އަހުޒަމާއި ރިފާސް ކައިރީ ބުނެ، މަސްތުވާތަކެތިން އެ ދެ މީހުންނަށް ނައީމާ މަރާލުމުގެ އަގު ދީފައި ކަމަށެވެ. އަދި ނައީމާ މަރާލުމަށް އޭޕްރީލް ހަވަނަ ދުވަހުގެ ދަންވަރު އޭނާގެ ގެ ކައިރިއަށް އަހުޒަމާއި ރިފާސް ކާރުގައި ގެންގޮސްދިނީ ވެސް ފަވާޒު ކަމަށް ޝަރީއަތުގައި ވަކީލު ވަނީ ވިދާޅުވެފަ އެވެ.
މި މައްސަލައިގައި ރިފާސްގެ އަޑުއެހުމުގައި އޭނާ ބުނީ އޭނާގެ މައްޗަށް ކުރި ތިން ދައުވާއަށް ވެސް ޖަވާބެއް ދޭން އެނގޭނީ އޭނާގެ ވަކީލާ ވާހަކަދެއްކުމަށް ފަހު ކަމަށެވެ. އޭނާ ބުނީ ވަކީލު ފޮނުވި ލިޔެކިޔުންތައް ހުރީ ވާރޭގެ ސަބަބުން ހަލާކުވެފައި ކަމަށާއި އޭގެ ސަބަބުން ދައުވާތަކަށް އެއްބަސްވާންވެސް ނުވަތަ އިންކާރުކުރަންވެސް ނޭނގޭ ކަމަށެވެ.
ދައުވާ ރައްދުވާ ތިން މީހުންގެ ތެރެއިން އަހުޒަމްގެ އަޑުއެހުން އޮތީ މިއަދު މެންދުރުފަހު އެކެއް ޖަހާއިރު އެވެ.