ފޭކް ސްލިޕެއް ފޮނުވައިގެން ފިހާރައަކުން މުދާ ނެގި މީހަކު 11،600 ރުފިޔާއިން ޖޫރިމަނާކުރުމަށް ހުކުމްކޮށްފި އެވެ.
ކްރިމިނަލް ކޯޓުން މި ހުކުމްކޮށްފައިވަނީ ހދ. ވައިކަރަދޫ، މިލާފަރު، އަލީ ރަޝީދުގެ މައްޗަށެވެ.
މަކަރާއި ހީލަތް ހެދުމުގެ ދައުވާ ދައުލަތުން އޭނާގެ މައްޗަށް އުުފުލީ ޖޫން 23، 2021 ގައި ފިހާރައަކުން ފަސް ދަޅު ރެޑްބުލް އާއި ތިން ފޮށި ކެމެލް ހާޑް ސިނގިރެޓް ގަތުމަށް 500 ރުފިޔާގެ ފޭކް ސްލިޕެއް އެ ފިހާރައަށް ވައިބާ ކުުރުމާ ގުޅިގެންނެވެ.
ޝަރީއަތުގެ މަޖިލީހުގައި އަލީ ރަޝީދު ވަނީ އެއީ އޭނާ ފޮނުވި ސްލިޕެއް ނޫން ކަމަށް ބުނެ ދައުލަތުގެ ދައުވާއަށް އިންކާރުކޮށްފަ އެވެ. އެހެންވެ އޭނާގެ މައްޗަށް ކުށް ސާބިތު ކުރީ ހެއްކާއި ގަރީނާ ހުށަހަޅައިގެންނެވެ.
މަކަރާއި ހީލަތް ހެދުމުގެ ކުށުގެ އަސާސީ އަދަބަކީ ދެ މަހާއި 12 ދުވަހަށް ޖަލަށްލުމެވެ. ނަމަވެސް އަލީ ރަޝީދު ކުރި ކުށާ ގުޅިގެން އޭނާ ކުރިން ބަންދުގައި 14 ދުވަހު ހުރެފައިވާތީ އެއް މަހާއި 28 ދުވަސް ކަމަށް ހުކުމްގައި ވަނީ ކަނޑައަޅާފަ އެވެ. އެކަމަކު ޖަލު އަދަބު، ޖޫރިމަނާއަކަށް ބަދަލުކޮށްދިނުމަށް އަލީ ރަޝީދު އެދިފައިވާތީ އަދި މިއީ ޖިނާއީ ބޮޑު ކުށަކަށް ނުވާތީ ގާޒީ ވަނީ ޖަލު އަދަބު، ޖޫރިމަނާއަށް ބަދަލުކޮށްދީފަ އެވެ.
އޭނާ ޖޫރިމަނާކުރީ 11،600 ރުފިޔާ އަށެވެ. އަދި އެ ފައިސާ އެއް މަސް ދުވަހުގެ ތެރޭގައި މީރާއަށް ދެއްކުމަށްވެސް ހުކުމްކުރި އެވެ.