ފެޑެކްސް ކޫރިއާ ސާވިސް މެދުވެރިކޮށް ރާއްޖެއަށް މަސްތުވާތަކެތި އެތެރެކުރި މީހަކު އުމުރަށް ޖަލަށްލުމަށް ހުކުމްކޮށްފި އެވެ.
ކްރިމިނަލް ކޯޓުން މިދިޔަ އާދިއްތަ ދުވަހު މި ހުކުމް ކޮށްފައިވަނީ އައްޑޫ ސިޓީގެ ހިތަދޫ، ޖީބްރޯލްޓާ، ޝަރުވާން ސަލީމްގެ މައްޗަށެވެ.
ދައުލަތުން އޭނާގެ މައްޗަށް އުފުލީ މަސްތުވާތަކެތި ޓްރެފިކް ކުރުމުގެ ދައުވާ އެވެ.
ފުލުހުން މިތަކެތި އަތުލައިގަތީ ފްލައި ދުބާއީގެ ފްލައިޓެއްގައި މިތަކެތި ރާއްޖެ އެތެރެކޮށް ފެޑެކްސްގެ އޮފީހުގައި ފުލުހުން ތިބެގެން ކުރިއަށް ގެންދިޔަ އޮޕަރޭޝަނެއްގެ ތެރެއިންނެވެ.
މިފޮށިގަނޑާ ހަވާލުވާން ފެޑެކްސް އޮފީހަށް ދިޔައީ މުހައްމަދު ޝިޔާހު އަލީ ނަމަކަށް ކިޔާ މީހެކެވެ. އެކަމަކު އޭނާ އަކީ "ސަނާ" ކިޔާ މީހަކު ބުނެގެން އެ ފޮށިގަނޑާ ހަވާލުވާން ދިޔަ މީހެކެވެ. އެހެންވެ ފުލުހުންގެ ބެލުމުގެ ދަށުން އޭނާ ވަނީ ސަނާއަށް ގުޅައި އެ ފޮށިގަނޑާ ހަވާލުވުމަށް އައުމަށް އެދިފަ އެވެ. އެވަގުތު އެތަނަށް ސަނާގެ ގޮތުގައި ދިޔަ މީހަކީ ޝަރުވާން އެވެ.
ޝަރުވާން އެތަނަށް ގޮސް ސައިކަލް އެ ފޮށިގަނޑު ހިފައިގެން ނައްޓާލިތަނާ ފުލުހުން އޭނާ ހުއްޓުވާ ފޮށިގަނޑު ބަލައި ފާސްކުރިއިރު މަސްތުވާތަކެތި ހުރި ދެ ރަބަރު ޕެކެޓް ފެނުނެވެ. އެތަކެތީފެ ބަރުދަނުގައި 989.1 ގްރާމް ހުއްޓެވެ.
ޝަރީއަތުގައި ޝަރުވާން ވަނީ ދައުވާއަށް އިންކާރުކޮށްފަ އެވެ. އެހެންވެ މިމައްސަލަ ސާބިތު ކުރީ ދައުލަތުން ހުށަހެޅި ހެއްކާއި ގަރީނާއަށް ބަލައިގެންނެވެ.
ގާޒީ ކުރި ހުކުމްގައި ބުނެފައިވަނީ ކުށުގެ ހުރިހާ ރުކުނެއް އޭނާގެ މައްޗަށް ދައުލަތުން ސާބިތު ކޮށްދީފައިވާ ކަމަށެވެ. އެހެންވެ ގާޒީ ވަނީ އޭނާގެ މައްޗަށް 25 އަހަރުގެ ޖަލު ހުކުމަކާއި އެއްލައްކަ ރުފިޔާގެ ޖޫރިމަނާއެއް އިއްވާފަ އެވެ.