ބަނގުރަލާއެކު މާލޭއިން ހައްޔަރު ކުރި އިންޑިއާ ދެ މީހެއްގެ އަތުން ވަގު ޑޮލަރުތަކެއް ފެނިއްޖެ އެވެ.
ވަގު ޑޮލަރުތަކަކާއެކު ހައްޔަރުކޮށްފައި ވަނީ އުމުރުން 43 އަހަރުގެ މީހަކާއި 42 އަހަރުގެ މީހެކެވެ.
މައުލޫމާތު ލިބިފައިވާ ގޮތުގައި މި ދެ މީހުންނަކީވެސް އިމިގްރޭޝަން ގާނޫނާ ހިލާފަށް ރާއްޖޭގައި އުޅެމުންދާ ދެ މީހުންނެވެ. މި ދެ މީހުން ހައްޔަރުކޮށް ކޯޓަށް ހާޒިރު ކުރުމުން ދެ މީހުންވެސް 15 ދުވަހަށް ބަންދުކޮށްފައި ބޭތިއްބުމަށް ކޯޓުންވަނީ އަމުރުކޮށްފައެވެ.
މި ދެ މީހުންގެ ބަންދު އަމުރު ރިޕޯޓުން އެނގޭ ގޮތުގައި މި ދެ މީހުން ހައްޔަރު ކުރީ ޓަޗްމާޓް ކިޔާ ފިހާރައެއްގައި ބަނގުރާ ވިއްކާކަމުގެ މައުލޫމާތު ލިބިގެންނެވެ.
އެ ފިހާރަ ބަލައި ފާސްކުރިއިރު، އެ ތަނުގެ ގުދަނުން ގިނަ އަދަދެއްގެ ބަނގުރަލާއި ފައިސާ ފެނިފައިވެއެވެ. އެތަނުން ފެނުނު ފައިސާގެ ތެރޭގައި ވަގު ޑޮލަރު ހިމެނޭކަން މި ދެ މީހުންގެ ބަންދު އަމުރު ރިޕޯޓުގައި ފާހަގަކޮށްފައިވެ އެވެ.
އިންޑިޔާ ދެ މީހެއްގެ އަތުން ވަގު ޑޮލަރު މި ފެނުނީ، ރާއްޖޭގައި ބޭރު ފައިސާގެ ތާށިކަން އިންތިހާއަށް ބޮޑުވެފައިވަނިކޮށެވެ.
