މަނީ ލޯންޑަރިންގެ ތުހުމަތުގައި ބަންގްލަދޭޝް މީހަކު ހައްޔަރުކޮށްފި އެވެ.
މި މީހާގެ ބަންދާ މެދު ގޮތެއް ނިންމުމަށް އިއްޔެ ކޯޓަށް ހާޒިރުކުރުމުން އޭނާގެ ބަންދަށް 15 ދުވަސް ކޯޓުން ދީފައިވެ އެވެ.
ބަންގްލަދޭޝް މީހަކު ވަގަށް ރާއްޖެއިން ބޭރުކުރަން އުޅުނު 80 ހާސް ޑޮލަރާއެކު އާދިއްތަ ދުވަހު ވަނީ އަތުލައިގެންފަ އެވެ. ކޯޓުން މުއްދަތު ޖެހި މީހާ އަކީ އެއާޕޯޓުން ހިފެހެއްޓި މީހާ ކަމެއް އަދި ސާފެއް ނުވެ އެވެ. ހައްޔަރުކޮށް ބަންދު މުއްދަތު ޖަހާފައިވަނީ 32 އަހަރުގެ ފިރިހެނަކަށެވެ. އޭނާގެ ނަމަކީ، ޝަހްމިން އިސްލާމް ޝަގުރް އެވެ.
މަނީ ލޯންޑަރިންގެ ތުހުމަތު ކުރެވޭ މީހާއަށް މުއްދަތު ޖެހީ ކްރިމިނަލް ކޯޓުގެ ގާޒީ އަލީ އާދަމް އެވެ. ބަންދު ކުރެވޭ މީހާގެ މައްސަލައިގެ ބައެއް ހުލާސާ ތަފްސީލްތައް ކޯޓު އަމުރުތަކުގައި ބައެއް ފަހަރު ހިމަނާފައި ހުރި ނަމަވެސް މި މައްސަލައިގައި އެފަދަ މައުލޫމާތެއް ގާޒީ އަލީ އާދަމްގެ ބަންދު އަމުރު ރިޕޯޓުގައި ހިމަނާފައެއް ނެތެވެ.
އާދިއްތަ ދުވަހު އެއާޕޯޓުން ބަންގްލަދޭޝް މީހަކު އަތުލައިގަތީ ޔޫއެސް ބަންގްލާ އެއާލައިނުން ފުރަން އުޅެނިކޮށެވެ. އެ މީހާ އަތުލައިގަތް އިރު، ފޮރުވައިގެން ބޭރުކުރަން އުޅުނީ 81،030 ޑޮލަރެވެ. މި މީހާ މި ޑޮލަރުތައް ރާއްޖެއިން ބޭރުކުރަން މަސައްކަތް ކުރީ ލަގެޖްގައި ފޮރުވައިގެންނެވެ.
މަނީ ލޯންޑްރިންއަށް ތުހުމަތު ކުރެވޭ ބަންގްލަދޭޝް މީހަކު ހައްޔަރުކުރިއިރު، ވަގު ޑޮލަރުތަކެއް ގެންގުނު އިންޑިއާ ދެ މީހަކުވެސް ވަނީ މި ހަފްތާގައި ހައްޔަރުކޮށްފަ އެވެ.