ފަލަސްތީނުގެ ރައްޔިތުންނަށް ހަދިޔާކުރުމަށް ހަމަޖެހިފައިވާ މަސްދަޅު ކޭސްތަކުގެ ފުރަތަމަ ޝިޕްމަންޓް މި މަހު ފޮނުވާނެ ކަމަށް ރައީސް އޮފީހުގެ ޗީފް ސްޕޯކްސްޕާސަން ހީނާ ވަލީދު ވިދާޅުވެއްޖެ އެވެ.
ރައީސް އޮފީހުގައި މިއަދު ބޭއްވި ނޫސްވެިރންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުން ހީނާ ވިދާޅުވީ ފަލަސްތީނަށް ހަދިޔާކުރަން ހަމަޖެހިފައިވާ 7،800 މަސްދަޅު ކޭހުގެ ފުރަތަމަ ޝިޕްމަންޓް މި މަހުގެ 15ވަނަ ދުވަހު ޝިޕްކުރުމަށް ހަމަޖެހިފައިވާ ކަމަށެވެ.
ހީނާ ވިދާޅުވީ ޝިޕްމަންޓް ފުރަތަމަ ލިބޭނީ މިސްރުގެ ރެޑް ކްރެސެންޓަށް ކަމަށާއި ފަލަސްތީނުގެ ރެޑް ކްރެސެންޓަށް އެ ޝިޕްމަންޓް ލިބޭނީ އޭގެ ފަހުން ކަމަށެވެ.
"އެންމެ ފުރަތަމަ ޝިޕްމަންޓް އިރާދަކުރެއްވިއްޔާ މި މަހުގެ 15ވަނަ ދުވަހު މިހާރު ފުރުވާލުމަށްޓަކައި ރެޑީ ވެފައި މިވަނީ،" ހީނާ ވިދާޅުވި އެވެ.
ހީނާ ވިދާޅުވި ގޮތުގައި އެ ކޭސްތައް ފަލަސްތީނުގެ ރައްޔިތުންނަށް ލިބޭނީ ޝިޕްކުރާތާ ގާތްގަނޑަކަށް 40 ދުވަހަށް ފަހު ކަމަށެވެ.
ފަލަސްތީނުގެ ރައްޔިތުންނަށް އެހީ ފޯރުކޮށްދިނުމަށް ޓަކައި މީގެ ކުރިން ޓެލެތޯނެއް ބާއްވާފައިވާކަން ފާހަގަކުރައްވައި ހީނާ ވިދާޅުވީ އެ ޓެލެތޯނުން ލިބުނު 19 މިލިއަނަށް ވުރެ ގިނަ ރުފިޔާ މިހާރު ވަނީ އަންރުވާ އެކައުންޓަށް ޖަމާކޮށްފައި ކަމަށެވެ.
ހީނާ ވިދާޅުވީ ރައްޔިތުންގެ މަޖިލީހުގެ ފެށޭ ދައުރުގައި އިޒްރޭލު ޕާސްޕޯޓުގައި ރާއްޖެއަށް އެތެރެނުވެވޭ ގޮތަށް ހެދުމުގެ މަސައްކަތް ބާރަށް ކުރިއަށް ދާނެ ކަމަށެވެ.
ހީނާ އިތުރަށް ވިދާޅުވީ މި ސަރުކާރަކި ފަލަސްތީނުގެ މިނިވަންކަމަށް އެންމެ ބޮޑަށް ވަކާލާތުކުރާ އެއް ސަރުކާރު ކަމަށާއި ފަލަސްތީނާ ދޭތެރޭ އޮންނަ ސްޓޭންޑް ބަދަލުނުވާ ކަމަށެވެ.