އެންމެންގެ އެއްބާރުލުމާއެކު މާލެ ސަރަހައްދުގެ މަގުތަކަކީ ރައްކާތެރި ތަނަކަށް ހެދޭނެ ކަމަށް ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވެއްޖެ އެވެ.
މާލެ ސަރަހައްދުގައި މިދުވަސްވަރު ހިނގާ ނުރައްކާތެރި އެކްސިޑެންޓުތައް ވަރަށް ބޮޑަށް އިތުރުވެފައިވާތީ އާންމުން ދަނީ ކަންބޮޑުވުން ފާޅުކުރަމުންނެވެ.
މިކަމާ ގުޅިގެން މިނިސްޓަރު އަމީން އެކްސްގައި ކުރެއްވި ޕޯސްޓެއްގައި ވިދާޅުވީ މާލެ ސަރަހައްދުގައި މަގުމަތީގެ ރައްކާތެރިކަން ގާއިމުކުރުމަކީ ކުރެވޭނެ ކަމެއް ކަމަށެވެ.
މިނިސްޓަރު ވިދާޅުވީ މަގުމައްޗަކީ ރައްކާތެރި ތަނަކަށް ހެދުމަށްޓަކައި ގިނަ މަސައްކަތްތަކެއް ކުރަމުންދާ ކަމަށެވެ. އެންމެން ގުޅިގެން މާލެ ސަރަހއްދުގެ މަގުތަކަކީ ރައްކާތެރި ތަނަކަށް ހެދޭނެތީވެ އެކަމަށް އެއްބާރުލުން ދިނުމަށްވެސް މިނިސްޓަރު އެދިވަޑައިގެންނެވި އެވެ.
"މިކަމުގައި ކުރިއަށް ދާން ހިނގާ - ތިބޭފުޅުންގެ އެއްބާރުލުން މުހިއްމީ،" މިނިސްޓަރު ވިދާޅުވި އެވެ.
މާލޭގައި މިފަހުން ވަނީ ނުރައްކާތެރި އެކްސިޑެންޓުތަކެއް ހިނގާފަ އެވެ. އަދި ކާރާއި ސައިކަލު ޖެހިގެން ހިނގި ދެ އެކްސިޑެންޓުގައި ދެމީހަކު މަރުވެފައިވެ އެވެ.
ދާދި ފަހުން ހިނގި އެކްސިޑެންޓެއްގައި ބޮޑެތި އަނިޔާތަކެއް ލިބުނު މީހަކަށް މިހާރުވެސް ދަނީ ވެންޓިލޭޓަރުގައި ފަރުވާ ދެމުންނެވެ.
މިފަދަ ނުރައްކާތެރި އެކްސިޑެންޓުތައް މަދުކުރުމަށްޓަކައި ފުލުހުން ވަނީ ޓްރފިކް ބެލެހެއްޓުން ފުޅާކޮށް، 24 ގަޑިއިރު ޕެޓްރޯލްކުރުމުގެ އޮޕަރޭޝަނެއް ވެސް ފަށާފަ އެވެ.