ރާއްޖޭގެ ތާރީހުގައި ސިޔާސީ ޕާޓިއަކުން ބާއްވާނެ އެންމެ ބޮޑު އިންތިހާބު ވެރިކަން ކުރާ ޕީއެންސީ އިން ކުރިއަށް އޮތް އޮކްޓޯބަރު 19 ވަނަ ދުވަހު ބާއްވާނެ ކަމަށް އެ ޕާޓީން ބުނެފި އެވެ.
ޕީއެންސީ އިން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ޕީއެންސީގެ އިންތިހާބީ ކޮމިޓީގެ މެމްބަރު އަދި ހެލްތް މިނިސްޓަރު ޑރ. އަބްދުﷲ ހަލީލް ވިދާޅުވީ އަންނަ އޮކްޓޯބަރު މަހުގެ 19 ވަނަ ދުވަހު ޕީއެންސީގެ އެތެރޭގެ އިންތިހާބު ބާއްވާނެ ކަމަށާއި އެ އިންތިހާބު ވެގެންދާނީ ރާއްޖޭގައި މިހާތަނަށް ސިޔާސީ ޕާޓީއަކުން ބާއްވާނެ އެންމެ ބޮޑު އިންތިހާބަށް ކަމަށެވެ.
ހަލީލް ވިދާޅުވީ ޕާޓީގެ ދަފްތަރުގައި ހިމެނޭ ކޮންމެ މީހަކަށްވެސް އިންތިހާބުގައި ވާދަކުރެވޭނެ ކަމަށާއި މި އިންތިހާބުގައި ދާއިރާތަކުގެ ރައީސް، ދާއިރާތަކުގެ ނައިބް ރައީސް، ޒުވާނުންގެ ހަރަކާތުގެ ރައީސް، އަންހެނުންގެ ހަރަކާތުގެ ރައީސް އަދި ސްޓިއަރިން ކޮމިޓީތަކުގެ މެމްބަރުންވެސް އިންތިހާބު ކުރާނެ ކަމަށެވެ.
އިންތިހާބުގައި ދާއިރާގެ ރައީސް ކަމަށް ކުރިމަތިލާ ކޮންމެ މީހަކު ޕާޓީއަށް މުޅިން އާ 50 މެމްބާޝިޕް ފޯމާއި، ނައިބް ރައީސް ކަމަށް ކުރިމަތިލާ ކޮންމެ މީހަކު މުޅިން އާ 25 މެމްބާޝިޕް ފޯޟު ހުށަހަޅަން ޖެހޭނެ ކަމަށް ހަލީލް ވިދާޅުވި އެވެ.
ޕީއެންސީގެ އިންތިހާބުގައި ރައްޔިތުންގެ މަޖިލީހުގައި ހިމެނޭ ކޮންމެ ދާއިރާއަކީ ވަކި ދާއިރާއެއް ކަމަށް ބަލައި އެއިން ކޮންމެ ދާއިރާއެއްގެ މަގާމުތަކަށް މީހުން ހޮވުމަށް ހަމަޖެހިފައިވެ އެވެ. އެކަމަކު ދާއިރާގެ ރައީސުން އިންތިހާބުކުރާއިރު ރައްޔިތުންގެ މަޖިލީހުގައި މެމްބަރުންގެ ގޮތުގައި ތިއްބެވި ބޭފުޅުން އެ ދާއިރާއެއްގެ ރައީސް ކަމަށް އޮޓޮމެޓިކުން ހޮވޭނެ ކަމަށާއި މެމްބަރުން މަޖިލީހުގައި ނެތް ދާއިރާތަކަށް ރައީސުން އިންތިހާބު ކުރެވޭނެ ކަމަށް މިނިސްޓަރު ވިދާޅުވި އެވެ. އަދި ހުރިހާ ދާއިރާއަކަށްވެސް ނައިބް ރައީސް އިންތިހާބު ކުރެވޭނެ ކަމަށްވެސް ވިދާޅުވި އެވެ.
"ރައްޔިތުނގެ މަޖިލީހުގައި ތއްބެވި މެމްބަރުން ތިއްބަވާނީ ހަމަ އެ ދާއިރާގެ ރައީސުންގެ ގޮތުގައި،" ހަލީލް ވިދާޅުވި އެވެ.
މިނިސްޓަރު ވިދާޅުވީ ކޮންމެ ރަށެއްގައިވެސް ސްޓިއަރިން ކޮމިޓީއެއްވެސް އޮންނާނެ ކަމަށާއި އެ ކޮމިޓީތަކަށްވެސް މެމްބަރުން އިންތިހާބު ކުރާނެ ކަމަށެވެ. އެގޮތުން 3،000 އަށް ވުރެ ކުޑަ އާބާދީއެއް އޮންނަ ރަށްރަށުގައި ހަތް މެމްބަރުންގެ ކޮމިޓީއެއް އެކުލަވާލާނެ ކަމަށާއި 3،000 އަށް ވުރެ ބޮޑު އާބާދީއެއް އޮންނަ ރަށްރަށާއި ސިޓީތަކުގައި ނުވަ މެމްބަރުންގެ ކޮމިޓީއެއް އެކުލަވާލާނެ ކަމަށެވެ.
ހަލީލް އިތުރަށް ވިދާޅުވީ ޕީޕީއެމްގެ ކައުންސިލަރުންގެ ގޮތުގައި ރަށްރަށުގައި ތިއްބެވި ބޭފުޅުން އަދި ސިޓީ ކައުންސިލްގައި ތިއްބެވި ބޭފުޅުން ސްޓިއަރިން ކޮމިޓީތަކަށް އެބޭފުޅުންގެ މަގާމުގެ ހައިސިއްޔަތުން އޮޓޮމެޓިކުން އިންތިހާބުވާނެ ކަމަށެވެ.
މި އިންތިހާބަށް މިއަދު އިއުލާންކުރުމަށް ވަނީ ހަމަޖެހިފަ އެވެ. މި އިންތިހާބަށް ކުރިމަތިލުމުގެ ސުންގަޑިއަކީ މިމަހުގެ 30 ވަނަ ދުވަހުގެ އިރުއޮއްސި 6:00 އެވެ.
ހަލީލް އިތުރަށް ވިދާޅުވީ މި އިންތިހާބުގައި ވޯޓު ލެވޭ މީހުންގެ ލިސްޓު ކުރިއަށް އޮތް އޮކްޓޯބަރު ހަތަރުވަނަ ދުވަހު އިއުލާންކުރާނެ ކަމަށެވެ. އަދި ޝަކުވާ ހުށަހެޅުމަށް ފުރުސަތު ދިނުމަށްފަހު ފައިނަލް ލިސްޓް އޮކްޓޯބަރު އަށެއްގައި އާންމުކުރާނެ ކަމަށްވެސް ވިދާޅުވި އެވެ.
މި އިންތިހާބުގެ ރަސްމީ ނަތީޖާ އިއުލާންކުރުމަށް ހަމަޖެހިފައިވާނީ 24 އޮކްޓޯބަރު ގައެވެ.