ރާއްޖޭގައި އިންވެސްޓް ކުރަން ހުރި ފުރުސަތުތައް އޮމާން ސަރުކާރާ ހިއްސާކޮށްފި އެވެ.
މި މައުލޫމާތު ދިވެހި ސަރުކާރުގެ ފަރާތުން އޮމާންގެ މާލީ ވަޒީރު ސުލްތާން ބިން ސާލިމް ބިން ސާއިދު އަލްހަބްސީއާ ހިއްސާކުރެއްވީ ރާއްޖޭގެ ފޮރިން މިނިސްޓަރު ޑރ. އަބްދުﷲ ޚަލީލް އޮމާނަށް މިހާރު ކުރައްވަމުން ގެންދަވާ ރަސްމީ ދަތުރުފުޅުގައި މިއަދު ސާލިމްއާ އެކު ބޭއްވެވި ބައްދަލުކުރެއްވުމުގައެވެ.
ރާއްޖޭގެ ފޮރިން މިނިސްޓްރީން ބުނީ މިބައްދަލުކުރެއްވުމުގައި ރައީސް ޑރ. މުހައްމަދު މުއިއްޒުގެ ސަރުކާރުން ގެންގުޅޭ ތަރައްގީގެ ސިޔާސަތުތަކުގެ އިތުރަށް ރާއްޖޭގައި އިންވެސްޓުކުރަން ހުރި ފުރުސަތުތަކުގެ މައުލޫމާތު ޑރ. ހަލީލް ހިއްސާކުރެއްވި ކަމަށެވެ.
މީގެއިތުރުން ދެ ގައުމުގެ ގުޅުން އެކި ދާއިރާތަކުން އިތުރަށް ބަދަހިކުރުމާ ގުޅޭގޮތުންވެސް ދެ ބޭފުޅުން މަޝްވަރާ ކުރެއްވި ކަމަށް މިނިސްޓްރީން ބުންޏެވެ.
ޑރ. ހަލީލް އޮމާނަށް ރޭ ފުރާވަޑައިގެންނެވީ އެ ގައުމުގެ ފޮރިން މިނިސްޓަރު ސައްޔިދު ބަދުރު ބިން ހަމަދު ބިން ހަމޫދު އަލްބުސައިދީގެ ދައުވަތަކަށެވެ.
ޑރ. ހަލީލްގެ މިދަތުރުފުޅު ނިންމަވާލެއްވުމަށް ހަމަޖެހިފައިވަނީ މި މަހުގެ 13 ވަނަ ދުވަހު އެވެ.
މި ދަތުރުފުޅުގައި މިނިސްޓަރު ޑރ. ހަލީލްގެ އަރިހުގައި ސެކްރެޓަރީ، ބައިލެޓަރަލް، ޑރ. ހާލާ ހަމީދާއި ސީނިއާ އަންޑާ ސެކްރެޓަރީ ފާތިމަތު ނައީމާ އަދި އެސިސްޓަންޓް ޑިރެކްޓަރު މުހައްމަދު ޝުޖާއު ބައިވެރިވެވަޑައިގަންނަވަ އެވެ.