ބައިނަލްއަގްވާމީ މައިދާނުގައި ރާއްޖެއިން ގެންގުޅޭ ސިޔާސަތަށް ބަދަލެއް އައިސްފައި ނުވާ ކަމަށް ފޮރިން މިނިސްޓަރު ޑރ. އަބްދުﷲ ހަލީލް ވިދާޅުވެއްޖެ އެވެ.
މިނިސްޓަރު ހަލީލް މިހެން ވިދާޅުވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެސްޓޯނިއާއަށް ކުރައްވަމުން ގެންދަވާ ދަތުރުފުޅުގައި އެ ގައުމުގެ ގާނޫނު ހަދާ މަޖިލީހުގެ ރައީސް ލޯރީ ހޫސަރުއާ ބައްދަލުކުރައްވާ ސަލާމަތީ ކަންކަމާއި، ޔޫކްރެއިނަށް ތާއީދު ކުރުމާއި، ބައިނަލްއަގްވާމީ ގާނޫނުތައް ދެމެހެއްޓުމާ ބެހޭ ގޮތުން މަޝްވަރާ ކުރެއްވި ކަމަށް އެސްޓޯނިއާ ތަމްސީލުކުރާ ޓްވިޓާ އެކައުންޓަކުން ޕޯސްޓެއް ކޮށްފައި ވަނިކޮށެވެ.
އެ ޕޯސްޓާއެކު ރަޝިއާ-ޔޫކްރެއިން ހަނގުރާމައިގައި ރާއްޖެއިން ޔޫކްރޭނަށް ތާއިދުކުރާ ކަމަށް ރާއްޖޭގެ ބައެއް ނޫސްތަކުން ރިޕޯޓްކުރި އެވެ.
މިނިސްޓަރު ހަލީލް ވިދާޅުވީ ބައިނަލްއަގްވާމީ މައިދާނުގައި ރާއްޖެއިން ގެންގުޅޭ ސިޔާސަތުތައް ބަދަލު ނުވާ ކަމަށާއި އދ ގައި ރާއްޖެއިން ވޯޓު ދެމުންދާ ގޮތް ބަލާލުމުން އެކަން ސާފުވާނެ ކަމަށެވެ.
"ކުދި ގައުމުތަކުގެ މިނިވަންކަމާއި ސިޔާދަތާއި އިސްތިގުލާލަށް ބުރޫއަރާ ފަދަ ހާލަތްތަކުގައި ރާއްޖެއިން އަބަދުވެސް ނަގަނީ ޕްރިންސިޕަލް ސްޓޭންޑެއް،" ހަލީލް ވިދާޅުވި އެވެ.
ހަލީލް އިތުރަށް ވިދާޅުވީ ރާއްޖޭގެ ހާރިޖީ ސިޔާސަތު ބިނާވަނީ އެއްވެސް ގައުމަކާ ހަތުރުވެރި ނުވެ ދިވެހި ރައްޔިތުންނަށް ލާބައާއި މަންފާ ލިބޭ ގޮތަށް އަދި ރާއްޖޭގެ މިނިވަންކަމާ ސިޔާދަތަށް ބުރޫ ނާރާގޮތަށް ހުރިހާ ގައުމަކާއެކީވެސް ގާތް ގުޅުން ބޭއްވުމުގެ މައްޗަށް ކަމަށެވެ.