މި އަހަރުގެ ދިރާގު މޯލްޑިވްސް ރޯޑް ރޭސް މެދުވެރިކޮށް ދިރާގުން ކުޑަކުދިންގެ ރައްކާތެރި ކަމަށް މަސައްކަތްކުރާ 12 އެންޖީއޯއަކަށް ޖުމްލަ 680،850 ރުފިޔާ ހަދިޔާކޮށްފި އެވެ.
އެހެން އަހަރުތަކެކޭ އެއްފަދައިން މިއަހަރުގެ ދިރާގު މޯލްޑިވްސް ރޯޑް ރޭސް ވެސް ހާއްސަކުރެވިފައިވަނީ ކުޑަކުދިންގެ ރައްކާތެރި ކަމަށެވެ.
މި ދުވުމުގައި ކުޑަކުދިންގެ ރައްކާތެރިކަމުގެ ދާއިރާގައި ހަރަކާތްތެރިވާ އެންޖީއޯތަކަށް އާންމުން ހޭލުންތެރިކުރުވުމަށާއި ފަންޑްރެއިޒް ކުރުމުގެ ފުރުސަތު ފޯރުކޮށްދިނެވެ. އެގޮތުން ދިރާގުންވަނީ އެއްބައިވަންތަ މާހައުލެއް ބިނާކުރުމަށާއި ކުޑަކުދިންގެ ރައްކާތެރިކަމަށާއި އަނިޔާއިން ކުޑަކުދިން ހިމާޔަތްކުރުމުގެ އިތުރުން ކުދިންގެ ދުޅަހެޔޮކަމަށް ހޭލުންތެރިކަން އިތުރުކުރުމަށް މަސައްކަތް ކުރާ 12 އެންޖީއޯއަކާއެކު ޕާޓްނަ ވެފައެވެ.
އެގޮތުން ކޮންމެ ދުވުންތެރިއެއް ވެސް ރޭހަށް ރަޖިސްޓްރީ ކުރިއިރު އިހްތިޔާރުކުރާ އެން.ޖީ.އޯއެއް ނޮމިނޭޓްކުރުމުގެ ފުރުސަތު ހުޅުވާލެވުނެވެ.
މިގޮތުން ބައިވެރިންގެ ފަރާތުން އެންމެ ގިނައިން ނޮމިނޭޓްކުރެވުނު ފަސް އެންޖީއޯއަކަށް ބެހިގެންދާ ގޮތަށް ދިރާގުން ޖުމުލަ 200،000 ރުފިޔާގެ ހާއްސަ ޑޮނޭޝަންއެއް ހަދިޔާކުރެވުނެވެ.
މީގެ އިތުރުން ކޮންމެ ރަޖިސްޓްރޭޝަން ކިޓަކުން 100 ރުފިޔާއާއި ރީތި ބިބް ނަންބަރު ވިއްކައިގެން ލިބުނު ފައިސާއިން ޖުމްލަ 480.850 ރުފިޔާ ވަނީ ރޯޑް ރޭހުގެ ހުރިހާ ޕާޓްނާ އެންޖީއޯތަކަށް ބެހިގެންދާ ގޮތަށް ހަދިޔާކޮށްފަ އެވެ.
މިގޮތުން މިއަހަރުގެ ދިރާގު މޯލްޑިވްސް ރޯޑްރޭސް މެދުވެރިކޮށް ޖުމުލަ 680,850 ރުފިޔާ ވަނީ އެންޖީއޯތަކަށް ހަދިޔާކޮށްފަ އެވެ. އަދި މި އެހީގެ ސަބަބުން އެ ޖަމިއްޔާތަކުގެ ޕްރޮގްރާމްތައް ފެށުމަށް މަގުފަހިވެގެން ގޮސް، ރާއްޖޭގެ އެކި ކަންކޮޅުތަކުގައި ކުޑަކުދިން ހިމާޔަތްކުރުމަށް ކުރާ މުހިންމު މަސައްކަތްތަކުގެ ތެރެއިން އެ ޖަމިއްޔާތަކުގެ ޕްލޭންތައް ފެށުމަށް ހިތްވަރު ލިބިގެންދާނެކަމަށް އުންމީދުކުރާ ކަމަށްވެސް ދިރާގުން ވަނީ ބުނެފަ އެވެ.
ދިރާގުން ވަނީ ބައިވެރިންގެ އެންމެ ގިނަ ނޮމިނޭޝަން ލިބުނު ފަސް އެންޖީއޯގެ ތެރެއިން ކޮންމެ އެންޖީއޯއަކަށް ވެސް 80،071 ރުފިޔާ ހަދިޔާކޮށްފައެވެ.
ގިނަ ނޮމިނޭޝަން ލިބުނު ފަސް އެންޖީއޯ
- ކެންސަ ސޮސައިޓީ އޮފް މޯލްޑިވްސް
- މޯލްޑިވްސް އޯޓިޒަމް އެސޯސިއޭޝަން
- އާކް - އެޑްވޮކޭޓިންގް ދަ ރައިޓްސް އޮފް ޗިލްޑްރަން
- މޯލްޑިވްސް ތެލެސީމިއާ ސޮސައިޓީ
- ޗައިލްޑް އެބިއުސް ޕްރިވެންޝަން ސޮސައިޓީ
މީގެ އިތުރުން ދިރާގު މޯލްޑިވްސް ރޯޑް ރޭސް 2024 ގައި އެންޑޯސްކޮށްފައިވާ އަނެއް ހަތް އެންޖީއޯތަކުގެ ތެރެއިން ކޮންމެ އެންޖީއޯއަކަށް ދިރާގުން ވަނީ 40،071 ރުފިޔާ ހަދިޔާކޮށްފައިވެއެވެ.
ރޯޑް ރޭހުގައި އެންޑޯސްކޮށްފައިވާ އަނެއް ހަތް އެންޖީއޯ
- ޓައިނީ ހާޓްސް އޮފް މޯލްޑިވްސް
- ބްލައިންޑް އެންޑް ވިޝުއަލް އިމްޕެއާޑް ސޮސައިޓީ އޮފް މޯލްޑިވްސް (ބީވީއައިއެސްއެމް)
- ކެއާ ސޮސައިޓީ
- މޮމްސް އެއިޑް
- ސޮސައިޓީ ފޯ ހެލްތް އެޑިއުކޭޝަން (ޝީ)
- މޯލްޑިވްސް އެސޯސިއޭޝަން އޮފް ޕަރސަންސް ވިތް ޑިސްއެބިލިޓީސް (އެމްއޭޕީޑީ)
- ޑައިބެޓީސް ސޮސައިޓީ އޮފް މޯލްޑިވްސް
ދިރާގު މޯލްޑިވްސް ރޯޑް ރޭހަކީ ދިވެހިރާއްޖޭގައި ބާއްވާ ފުރަތަމަ އަދި ހަމައެކަނި ބައިނަލްއަޤްވާމީ ދުވުމެވެ. އަދި މިއީ ވޯލްޑް އެތުލެޓިކްސް ސަރޓިފައިޑް ރޭސް ރޫޓަކާއެކު އެސޯސިއޭޝަން އޮފް އިންޓަނޭޝަނަލް މެރަތަންސް އެންޑް ޑިސްޓަންސް ރޭސަސް (އެއިމްސް) ވޯލްޑް ރަނިން ކަލަންޑަރުގައި ލިސްޓުކޮށްފައިވާ ދުވުމެކެވެ.
ދިރާގުން ވަނީ އަންނަ އަހަރުގެ ދިރާގު މޯލްޑިވްސް ރޯޑް ރޭސް 24 އޮކްޓޫބަރު 2025 ގައި ބާއްވާނެކަމަށްވެސް އިއުލާނުކޮށްފައެވެ.