ރާއްޖޭގެ އެންމެ ކާމިޔާބު ފުޓްބޯޅަ ކުޅުންތެރިޔާ އަލީ އަޝްފާގު (ދަގަނޑޭ)ގެ ކަނާއަތު ކަކުލުގެ އޮޕަރޭޝަނެއް މިއަދު އިންޑިއާގެ ބެންގަލޫރުގައި ކޮށްފި އެވެ.
މި އޮޕަރޭޝަންގައި ދަގަނޑޭގެ ކަކުލުގެ ތިން މައްސަލައަކަށް ފަރުވާ ދީފައިވާ ކަމަށް މައުލޫމާތު ލިބެ އެވެ. މީގެތެރޭގައި އެންޓީރިއާ ކްރުޝުއޭޓް ލިގަމެންޓާއި މެނިސްކަސްއަށް ލިބިފައިވާ ގެއްލުންތައް ހިމެނެ އެވެ.
އުމުރުން 39 އަހަރުގެ މި ކުޅުންތެރިޔާ ވޭތުވެދިޔަ ފަސް އަހަރުން ފެށިގެން ދަނީ ކަކުލުގެ އަނިޔާތަކާ ކުރިމަތިލަމުންނެވެ.
މި މުއްދަތުގައި އޭނާ ވަނީ ގައުމީ ޓީމާއި ކްލަބު ފެންވަރުގައި ބައެއް މެޗުތައް ކުޅެފަ އެވެ. ނަމަވެސް އެ މެޗުތަކުގައިވެސް ކުޅެފައިވަނީ އަނިޔާގެ ވޭނާ އެކު އެވެ.
އޮޕަރޭޝަނަށް ދިއުމުގެ ކުރިން ދަގަނޑޭ ބުނެފައިވަނީ މިވަގުތު އޭނާ އެންމެ ބޮޑު އިސްކަމެއް ދެނީ އަނިޔާއިން ފަސޭހަވުމަށް ކަމަށެވެ. އަދި އަލުން ކުޅޭނެތޯ ނުވަތަ ނޫންތޯ ނިންމާނީ ރިކަވަރީއަށްފަހު ކަމަށްވެސް ބުނެފައިވެ އެވެ.
ދަގަނޑޭއަކީ 2001 ވަނަ އަހަރު ވެލެންސިއާއިން ފުޓުބޯޅަ ކެރިއަރު ފެށި ކުޅުންތެރިއެކެވެ. އޭނާ ވަނީ ރާއްޖެއާއި ބޭރުގެ އެކި ކްލަބުތަކާއެކު އަދި ގައުމީ ޓީމާއެކު ގިނަ ކާމިޔާބީތަކެއް ހޯދާފަ އެވެ. ނަމަވެސް ފަހަކަށް އައިސް އަނިޔާގެ މައްސަލަތަކާ ހެދި އޭނާގެ ކުޅުމުގެ ފެންވަރު ވަނީ ދަށްވެފަ އެވެ.
ދަގަނޑޭއަކީ ރާއްޖޭގެ އެންމެ މޮޅު ކުޅުންތެރިޔާގެ މަގާމު އެންމެ ގިނަ ފަހަރު ހޯދާފައިވާ ކުޅުންތެރިޔާ އެވެ. އަދި ލަނޑުޖެހުމުގައި ނިސްބަތުން އޭނާގެ ރެކޯޑު އޮތީ ދުނިޔޭގެ އެންމެ މަޝްހޫރު ފޯވަޑުންނާ އެއް ހަމައެއްގައެވެ.