އދގެ އާންމު މަޖިލީހުގެ 79 ވަނަ ސެޝަންގައި އިޒުރޭލުގެ ބޮޑުވަޒީރު ބެންޖަމިން ނަތަންޔާހޫ ތަގުރީރުކުރައްވަން ފެއްޓެވުމާ އެކު އެ މާލަމުގައި ތިއްބެވި ރާއްޖޭގެ ވަފްދުގެ ބޭފުޅުން އެ ތަނުން ނިކުމެއްޖެ އެވެ.
ނަތަންޔާހޫ ތަގުރީރު ކުރެއްވީ މީގެކުޑައިރުކޮޅެއް ކުރިންނެވެ.
ރައީސް އޮފީހުގެ ޗީފް ސްޕޯކްސްޕާސަން ހީނާ ވަލީދު ވިދާޅުވީ ރާއްޖޭގެ ވަފްދުން އެގޮތަށް އަމަލުކުރީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ފަލަސްތީނާ މެދު ގެންގުޅުއްވާ ހާއްސަ ކަމާއި، ފަލަސްތީނުގެ ހައްގުގައި އެމަނިކުފާނު ކުރައްވަމުން ގެންދަވާ ހާއްސަ މަސައްކަތްޕުޅަށް އިހްތިރާމް ކުރެއްވުމުގެ ގޮތުން ކަމަށެވެ.
"މިއީ ފަލަސްތީންގެ ހައްގުގައި އެޅުއްވި ފިޔަވަޅެއް،" ހީނާ ވިދާޅުވި އެވެ.
ފަލަސްޠީނުގެ ރައީސް މަހްމޫދު އައްބާސްއާ ބައްދަލުކުރައްވާ ރައީސުލްޖުމްހޫރިއްޔާ ވަނީ ފަލަސްތީނަކީ މިނިވަން ދައުލަތެއްގެ ގޮތުގައި ބަލައިގަތުމަށް ބައިނަލްއަގްވާމީ ގޮތުން ކުރެވޭ މަސައްކަތްތަކުގައި ދިވެހިރާއްޖެއިން ސާބިތުކަމާއެކު ދެމި އޮންނާނެކަމުގެ ކަށަވަރުކަން ދެއްވާފަ އެވެ.
އދގެ އާންމު މަޖިލީހުގައި ތަގުރީރު ކުރައްވަމުން ރައީސް މުއިއްޒު ވަނީ ފަލަސްތީނުގެ ރައްޔިތުންނަށް ކުރިމަތިލާން ޖެހިފައިވާ ނުރައްކާތެރި ހާލަތު ބަދަލުކުރުމަށް ބައިނަލްއަގްވާމީ މުޖުތަމައުން ގުޅިގެން މަސައްކަތް ކުރުމަށް އެދިވަޑައިގެންފަ އެވެ. އަދި ފަލަސްތީންގެ މިނިވަން ދައުލަތް ގާއިމުކުރުމަށް ގައުމުތަކުން އެއްބާރުލުން ދިނުމަށްވެސް ރައީސް އެދިވަޑައިގެންފައިވެ އެވެ.
ގާނޫނުގެ ވެރިކަން ނެގެހެއްޓުމުގެ މުހިއްމު ކަމާއި އަދުލު އިންސާފު ހަމަަހަމަކޮށް ގާއިމުވެފައި އޮތުމުގެ މުހިއްމު ފާހަގަކުރައްވާ ރައީސް ވަނީ އދގެ ފުރިހަމަ މެންބަރުކަން ފަލަސްތީނަށް ދިނުމަށްވެސް އދގެ އާންމު މަޖިލީހުގެ 79 ވަނަ ސެޝަންގައި އެމަނިކުފާނު ކުރެއްވި ތަގުރީރުގައި ގޮވާލައްވާފަ އެެވެ.