މޫސުމަށް އަންނަ ބަދަލުތަކަށް ހޭނުމަށް ކުރެވޭ މަސައްކަތްތަކަށް އެއްބާރުލުންދީ މާލީ އެހީތެރިކަން ހޯދުމަށް ކުރިމަތިވާ ދަތިތައް ކުޑަކުރުމުގައި އެއްބާރުލުން ދިނުމަށް އެންމެ ގިނައިން ވިހަ މާއްދާތައް ޖައްވަށް ބޭރުކުރަމުންދާ މުއްސަނދި ގައުމުތަކަށް ރައީސް ޑރ. މުހައްމަދު މުއިއްޒު ގޮވާލައްވައިފި އެވެ.
ރައީސުލްޖުމްހޫރިއްޔާ މިކަމަށް ގޮވާލެއްވީ އދގެ އާންމު މަޖިލީހުގެ 79 ވަނަ ސެޝަންގައި ތަގުރީރު ކުރައްވަމުންނެވެ.
ރައީސް މުއިއްޒު ވިދާޅުވީ މޫސުމަށް އަންނަ ބަދަލުތަކާ ދެކޮޅަށް މަސައްކަތްކުރުމާއި ދެމެހެއްޓެނިވި ތަރައްގީއަށް މަސައްކަތްކުރުމުގައި ބައިނަލްއަގްވާމީ މުޖުތަމައުން ހަރުދަނާ ފިޔަވަޅުތަކެއް މިހާރުން މިހާރަށް އަޅަންވެއްޖެ ކަމަށެވެ.
ރައީސްގެ ތަގުރީރުގައި ވަނީ މޫސުމަށް އަންނަ ބަދަލުތަކާ ދެކޮޅަށް މަސައްކަތްކުރުމާއި ވައި ތަޣައްޔަރުވުމާއި ދިރުންތައް ނެތިދިއުން ފަދަ ކަންކަމަށް ފިޔަވަޅު އެޅުމުގައި ބައިނަލްއަގްވާމީ މުޖުތަމައުން ގުޅިގެން މަސައްކަތްކުރުމަށް އެދިވަޑައިގެންފަ އެވެ.
"މިކަންކަމުގެ ތެރެއިންވެސް މޫސުމަށް އަންނަ ބަދަލުތަކުގެ މައްސަލައަކީ އިންސާނިއްޔަތަށް އެންމެ ބޮޑު ނުރައްކަލެއް އޮތް މައްސަލަ. އެކަމުގައި ގުޅިގެން މަސައްކަތްކުރުން މުހިއްމު،" އެމަނިކުފާނު ވިދާޅުވި އެވެ.
ރައީސް ވިދާޅުވީ މޫސުމަށް އަންނަ ބަދަލުތަކުގެ ސަބަބުން ރާއްޖެ ފަދަ ކުދި ޖަޒީރާ ގައުމުތަކުގެ އެތައް އަހަރުތަކެއްގެ ކުރިއެރުންތައް ނެތިގެންދާ ކަމަށެވެ. އަދި ގައުމުތަކުގެ ތަރައްގީގެ ކަންކަމަށް ހޭދަކުރުމަށް ހުންނަ މަދު ވަސީލަތްތައް ކުއްލި ހާދިސާތަކުގައި އެހީތެރިކަން ފޯރުކޮށްދިނުމަށާއި މޫސުމަށް އަންނަ ބަދަލުތަކަށް ހޭނުމަށް ކުރަންޖެހޭ މަސައްކަތްތަކަށް ހޭދަކުރަންޖެހޭ ކަމަށް ވިދާޅުވި އެވެ.
"އެހެންކަމުން އެކަށީގެންވާ ވަސީލަތްތަކާއެކު އެ މައްސަލަ ހައްލުކުރުމުގެ ނިޔަތާއެކު އަދި ސައިންސްގެ މައްޗަށް ބިނާވެފައިވާ ގޮތްތަކެއް މިހާރުން މިހާރަށް ހޯދަން މަސައްކަތް ކުރަންޖެހޭ،" ރައީސް ވިދާޅުވި އެވެ.
ރައީސް ވަނީ މޫސުމަށް އަންނަ ބަދަލުތަކާ ގުޅިގެން ކުދި ގައުމުތަކަށް ދިމާވާ ދަތިތައް ހައްލުކުރުމަށް އެހީތެރިވުމަށް މުއްސަނދި ގައުމުތަކުން ދީފައިވާ ޔަގީންކަމާ އެއްގޮތަށް އެފަރާތްތަކުން މަސައްކަތް ކޮށްދިނުމަށްވެސް ގޮވާލައްވާފަ އެވެ. އަދި ކޮޕް29 އާ ބައްދަލުކުރުމަށް ބައިނަލްއަގްވާމީ މުޖުތަމައުން ތައްޔާރުވަމުންދާއިރު މޫސުމީ ބަދަލުތަކުން އަރައިގަތުމަށް ބޭނުންވާ މާލީ ކަންކަން ހަމަޖެއްސުމަށް ކަނޑައަޅާފައިވާ އަމާޒުތައް، ބޭނުންވާ ގޮތަށް ހަމަޖެހިގެންދާނެކަން ކަށަވަރުކުރަންޖެހޭ ކަމަށްވެސް ވިދާޅުވި އެވެ.
އދގެ އާންމު މަޖިލީހުގެ 79 ވަނަ ސެޝަނުގައި ވާހަކަފުޅު ދައްކަވަމުން ރައީސް ވަނީ 2028 ވަނަ އަހަރު އަންނަންވާއިރަށް ރާއްޖެއަށް ބޭނުންވާ ކަރަންޓްގެ 33 އިންސައްތަ އިއާދަކުރަނިވި ހަކަތައިން އުފެއްދުމަށް ކަނޑައަޅާފައިވާ އަމާޒަށް ރާއްޖެއިން މަސައްކަތް ކުރަމުންދާ ކަމަށް ތަކުރާރުކޮށް ވިދާޅުވެފަ އެވެ.
ރާއްޖޭގެ ރައްޔިތުން ދިރިއުޅުމަށް ކުރާ މަސައްކަތުގައި ކަނޑުތަކަކީ މުހިއްމު ދައުރެއް އަދާކުރާ ތަނެއް ކަމަށްވެސް ރައީސް ވިދާޅުވި އެވެ. އަދި ޕްލާސްޓިކުން ކަނޑުތައް ތަޣައްޔަރުވުމުގެ މައްސަލައާއި ދިރުންތައް ހިމާޔަތްކުރުމާއި ނެތި ހިނގައިދާނެ ކަމުގެ ބިރު ހީވެފައިވާ ދިރުންތައް ހިމާޔަތްކުރުމުގައި އިތުރު ބާރެއްލައިގެން މަސައްކަތް ކުރުމަށްވެސް ރައީސް ގޮވާލެއްވި އެވެ.
މީގެ އިތުރުން އެމަނިކުފާނު ވަނީ މުސްތަގުބަލުގެ ޖީލުތަކަށްޓަކައި މޫސުމަށް އަންނަ ބަދަލުތަކާއި ވައި ތަޣައްޔަރުވުމާއި ދިރުންތައް ނެތިދިއުން ފަދަ މައްސަލަތަކުގައި ހަރުދަނާ ފިޔަވަޅުތަކެއް އެޅުމަށް ބައިނަލްއަގްވާމީ މުޖުތަމައުގެ ކިބައިން އެދިވަޑައިގެންފަ އެވެ.