ކުޑަ އަންހެން ކުއްޖަކާ އެކި ފަހަރު މަތިން ބެހުނު، އުމުރުން ދުވަސްވީ މީހެއްގެ މައްޗަށް ކުށް ސާބިތުވެ، ބަންދުކޮށްފި އެވެ.
މާލޭން ދެކުނުގެ ރަށަކަށް ނިސްބަތްވާ ދުވަސްވީ މި މީހާގެ މައްޗަށް، ކުޑަ ކުއްޖަކަށް އެކި ފަހަރު މަތިން ޖިންސީ ގޯނާކުރިކަން ސާބިތުވީ، ހައިކޯޓުގެ ޝަރީއަތުގައެވެ. މި މައްސަލައަކީ ދައުލަތުން ހައިކޯޓުގައި އިސްތިއުނާފު ކުރި މައްސަލަ އެކެވެ.
ދަށު ކޯޓުން ކުށް ސާބިތުނުވެ ދޫކޮށްލާފައި ހުރި ދުވަސްވީ މި މީހާގެ މައްޗަށް ކުށް ސާބިތުވީ ނަމަވެސް އަދި އެ މީހާގެ މައްޗަށް އަދަބު ކަނޑަނާޅަ އެވެ.
ހައިކޯޓުގައި އިއްޔެ އޮތް ޝަރީއަތުގައި އެ މީހާގެ މައްޗަށް ކުށް ސާބިތުވީ ކަމަށް ކަނޑައެޅުމަށްފަހު އެ މީހާ ބަންދު ކުރަން އަމުރުކުރީ، އަދަބާ މެދު ފަހުން ވާހަކަ ދައްކަން ފުރުސަތު ދިނުމަށް ފަހު އެވެ.
މި މައްސަލައަކީ އާއްމުކޮށް ހުޅުވާލައިގެން ކުރިއަށް ގެންދާ މައްސަލައެއް ނޫން ކަމުން މައްސަލައިގެ ތަފްސީލެއް ނުލިބެ އެވެ.
މައްސަލައިގައި ކުށް ސާބިތުވީ މީހާގެ ވަނަވަރު އެނގުނު ނަމަވެސް އެ ވަނަވަރު ހަބަރުގައި ހިމަނާފައި ނުވަނީ އަނިޔާ ލިބުނު ކުޑަ ކުއްޖާގެ މަސްލަހަތު ރައްކާތެރި ކުރުމަށެވެ.