ރިހި ގަހަނާ ވިއްކުމަށް ހާއްސަ ފިހާރަ "ހައުސް އޮފް ޖުވެލް"ގެ ދެވަނަ އައުޓްލެޓެއް ރޭ މާލޭގައި ހުޅުވައިފި އެވެ.
މި ފިހާރައަކީ އަސްލު ރިހި ގަހަނާ ވިއްކުމުގައި ނަން މަޝްހޫރު ފިހާރަ އެކެވެ. ފިހާރައިގެ ފުރަތަމަ އައުޓްލެޓް ހުޅުވީ މަޖީދީމަގުގަ އެވެ. އަދި ރޭ ދެވަނަ އައުޓްލެޓް ހުޅުވީ ފަރީދީމަގުގަ އެވެ.
ފިހާރައިގެ އެއް ހިއްސާދާރު ހަސަން ނިޔާޒު ރަޝީދު ބުނީ ގަހަނާ ވިއްކުމުގެ ވިޔަފާރިއަކީ ރަށްޓެއްސަކާއެކު އޭނާ ފެށި ވިޔަފާރިއެއް ކަމަށާއި މިފަދަ ވިޔަފާރިއެއް ފެށުމުގެ ހިޔާލު އައީ ރާއްޖޭގައި އަސްލު އަދި ކޮލިޓީ ގަހަނާ މާކެޓުގައި ނުހުންނާތީ ކަމަށެވެ.
ނިޔާޒު ބުނީ ރާއްޖޭގައި ގަހަނާގެ ވިޔަފާރިކުރާ ގިނަ ބަޔަކީ ބޭރުގެ ކޮންމެވެސް މީހަކާ ގުޅިގެން ވިޔަފާރި ކުރާ ބައެއް ކަމަށާއި ހައުސް އޮފް ޖުވަލްގައި ލިބެން ހުންނާނީ ހަމައެކަނި ދިވެހިންގެ ދިވެހި އުފެއްދުންތައް ކަމަށެވެ.
ފިހާރައިގެ ދެވަނަ އައުޓްލެޓް ރޭ ހުޅުވި އިރު ފާހަގަކޮށްލެވޭ އާ ޕްރޮޑަކްޓްތަކެއްވެސް ދައްކާލާފައިވެ އެވެ. އެއީ އިހު ޒަމާނުގައި ބޭނުންކުރި ފައިސާ ފޮތިން ހަދާފައިވާ އެކި ވައްތަރުގެ ގަހާނާ އެވެ. އެތަނަށް ދިޔަ އެތައް ބައެއްގެ ސަމާލުކަން ދަމައިގެން މި ޕްރޮޑަކްޓްތަކަކީ މީގެ އަހަރުތަކެއް ކުރިން ރާއްޖޭގައި ބޭނުންކުރި ފައިސާ ފޮތިން ހަދާފައިވާ ފަށާއި، ކަންފަތުގައި ލާ ތަކެއްޗާ އަދި އަނގޮޓި ފަދަ ކަސްޓަމައިޒް ކުރެވޭ ޕްރޮޑަކްޓްތަކެކެވެ.
"ދިގު މުއްދަތަށް އެ އެއްޗެހި ހަލާކުވިޔަ ނުދީ ގެންގުޅެވޭނެ ގޮތެއް ހޯދުމުގެ ގޮތުން ޖުވެލަރީއެއްގެ ގޮތުގައި އޭތި ހަދަން އަހަރުން އަސްލު ނިންމީ،" އާ ޕްރޮޑަކްޓްތަކާ ގުޅޭ ގޮތުން ނނިޔާޒު ބުންޏެވެ.
ނިޔާޒު ބުނީ ފިހާރައިގައި ހުރި ފައިސާ ފޮތިތަކުގެ ތެރެއިން ކަސްޓަމަރަކު ގަންނަން ބޭނުންވާ ފައިސާ ފޮއްޗެއް ބޭނުންކޮށްގެން ފަށެއް، ކަންފަތުގައި ލާ ގަހަނާ ނުވަތަ އަނގޮޓިއެއް ހެދޭނެ ކަމަަށެވެ. މި ޕްރޮޑަކްޓް ގަތުމުން އެއާއެކު އޮތެންޓިކޭޝަން ސެޓިފިކެޓެއްވެސް ދޫކުރެ އެވެ.
ނިޔާޒު ބުނީ އޭނާގެ އަމާޒަކީ ފިހާރައިގައި ވިއްކާ އަމިއްލަ ޕްރޮޑަކްޓުތައް ރާއްޖެއިން ބޭރުންވެސް ލިބޭނެ ދުވަހެއް ފެނުން ކަމަށެވެ.
ހައުސް އޮފް ޖުވެލް އިން އާދައިގެ ފަށާއި، ޖަވާހިރުން ޒީނަތްތެރިކޮށްފައިވާ އެކި ގަހަނާއާއި، އަންހެން އަދި ފިރިހެނުންނަށް ހާއްސަ ގަހަނާ ވެސް ލިބެން ހުރެ އެވެ.
މީގެއިތުރުން އަންހެން އަދި ފިރެހެނުންނަށް ހާއްސަ ގަޑިއާއި، ކުޑަކުދިން އަޅާލަން ރީތި އަނގޮޓިއާއި، ކަންފަތުގައި ލާ ތަކެތިވެސް ފިހާރައިން ލިބެން ހުރެ އެވެ.