އަންހެނުންނަށް ލިބެމުން އައި ފުރުސަތުތައް މި ސަރުކާރުން ހަނިކޮށްފައިވާ ކަމަށް އިދިކޮޅު އެމްޑީޕީ އިން ބުނެފި އެވެ.
އެމްޑީޕީގެ އަންހެނުންގެ ރޫހުން ނެރުނު ނޫސްބަޔާނެއްގައި ބުނީ އިޖުތިމާއީ، އިގުތިސާދީ އަދި ސިޔާސީ ރޮނގުން އަންހެނުން ބާރުވެރި ކުރުވުމަށް އެމްޑީޕީގެ ސަރުކާރުން ގިނަގުނަ މަސައްކަތްތަކެއްކޮށް ބޮޑެތި ކުރިއެރުންތަކެއް ހޯދި ކަމަށެވެ. ނަމަވެސް މި ސަރުކާރު އައުމާއެކު މި ހުރިހާ ރޮނގަކުން އަންހެނުންނަށް ލިބެމުން އައި ފުރުސަތުތައް ހަނިކޮށްފައިވާ ކަމަށް އެމްޑީޕީ އިން ބުނެ އެވެ.
"އެމްޑީޕީގެ ސަރުކާރުގެ ފަސް އަހަރު ތެރޭގައި އަންހެނުންނަށް ކުރިމަތިވާ ގޮންޖެހުންތައް ނައްތާލުމަށް މަސައްކަތްކޮށް، މުޖުތަމައުގެ ހުރިހާ ދާއިރާއެއްގައި އަންހެނުންނަށް ފުރިހަމައަށް، ބިނާކުރަނިވި ގޮތެއްގައި ބައިވެރިވެވޭނެކަން ކަށަވަރުކޮށްދިނުމަށް ކުރަމުން އައި މަސައްކަތްތައް މިއަދު މިވަނީ ހުއްޓުމަކަށް އައިސްފާކަން ހިތާމައާއެކު މި ޕާޓީއިން ފާހަގަކުރަމެވެ." އެމްޑީޕީން ބުނެފައިވެ އެވެ.
އެމްޑީޕީ އިން ވަނީ ޔޫއެންޑީޕީ އާއި ގުޅިގެން މިދިޔަ ސަރުކާރުން އެކުލަވާލި ޖެންޑާ އީކުއޭލިޓީ އެކްޝަން ޕްލޭންގައި މިއަހަރު ކުރަން ހުރި މަސައްކަތްތައް ހިނގަމުންދާ ގޮތުގެ ތަފުސީލު ސަރުކާރުން ހާމަނުކުރާތީ ކަންބޮޑުވުންފާޅުކޮށްފަ އެވެ.
އަންހެނުންގެ ތަރައްގީއަށް މަސައްކަތެއް ނުކުރެވުނުއިރު ސަރުކާރުން އަންހެނުންނަށް ކުރާ ފުރައްސާރަ އިތުރުވަމުންދާ ކަމަށް އެމްޑީޕީ އިން ބުނެ އެވެ.
"ހާއްސަކޮށް ސިވިލް ސާވިސްގައި މަސައްކަތްކުރާ އަންހެނުންނަށް މި ސަރުކާރު މިވަނީ ބިރަކަށް ވެފައެވެ." އެމްޑީޕީގެ ބަޔާނުގައި ބުނެފައިވެ އެވެ.
އެމްޑީޕީ އިން ބުނީ 20 ވަނަ ރައްޔިތުންގެ މަޖިލީހުގައި ސަރުކާރަށް ނިސްބަތްވާ މެމްބަރުން އަންހެނުންނަށް ކުޑައިމީސްވާ ގޮތަށް އަންހެނުންގެ ގަދަރަށް އުނިކަން ލިބޭފަދަ ގޮތަށް މަޖިލީހުގެ ތަޅުމުގައި ތަކުރާރުކޮށް ވާހަކަ ދައްކަމުންދާއިރު ސަރުކާރުން މިކަމުގައި ހަނުހުރުމަކީ މި ސަރުކާރުން މިފަދަ ކަންކަމުގައި ދެކޭ ގޮތް ސާފުކޮށް ހާމަކޮށްދޭ ކަމެއް ކަމަށް އެ ޕާޓީން ދެކޭ ކަމަށެވެ.