އައްޑޫ އިކްއިޓޯރިއަލް ހޮސްޕިޓަލްގައި ލޮލުގެ އްޕަރޭޝަނެއް ކުރި އުމުރުން ދުވަސްވީ މީހަކަށް ހޮސްޕިޓަލުން އިހުމާލުވި ކަމަށް އެ މީހާގެ އާއިލާއިން ތުހުމަތުކޮށްފި އެެވެ.
ލޮލުގެ އޮޕަރޭޝަން ކުރި މީހާގެ ދަރިއަކު ސޯޝަލްމީޑިއާގައި ކުރި ޕޯސްޓެއްގައި މިމައްސަލަ ވަނީ ހެލްތު މިނިސްޓްރީއާއި، އެޗައާރްސީއެމް އާއި، ފުލުހުންނާއި، އައްޑޫ ސިޓީގެ ކައުންސިލްގެ ސަމާލުކަމަށް ގެނެސްފަ އެވެ.
މި މީހާގެ ކަނާތު ލޮލުގެ އޮޕަރޭޝަން ކޮށްފައިވަނީ އައްޑޫ އިކްއެޓޯރިއަލް ހޮސްޕިޓަލްގެ ބިދެސީ އަންހެން ޑޮކްޓަރެއްގެ ލަފާގެ މަތިން ކަމަށްވެ އެވެ.
ސޯޝަލްމީޑިއާގައި ޕޯސްޓް ކުރި މީހާ ބުނީ އޭނާގެ ބައްޕަގެ ކަނާތު ލޮލުގެ އޮޕަރޭޝަނަަށްފަހު ވަރަށް ބޮޑަށް ލޮލަށް ތަދުވާތީ އުޅުނު ކަމަށާއި އަދި ލޮލުން ލޭ އަންނާތީ އެކަމުގެ ޝަކުވާވެސް ކުރަމުން ދިޔަ ކަމަށެވެ. އެ ޝަކުވާތަކަށް އޮޕަރޭޝަން ކުރި ޑޮކްޓަރާއި ނަރުހުންގެ ފަރާތުން އެކަށީގެންވާ ޖަވާބެއް ލިބިފައި ނުވާ ކަމަށްވެސް ބުންޏެވެ.
އާއިލާއިން ބުނީ ފަހުން ބައްޕަ މާލެ ގެނެސް އައިކެއާއަށް ދެއްކުމުން އޮޕަރޭޝަން ކުރި ތަން ރަނގަޅަށް ފަހާފައި ނުވާ ކަމަށް ބުނި ކަމަށެވެ. އަދި އޮޕަރޭޝަން ކުރި ތަން ރަނގަޅަށް ސާފުކޮށްފައި ނެތް ކަމަށް އައިކެއާ އިން ބުނާ ކަމަށްވެސް ބުންޏެވެ.
އޮޕަރޭޝަންގައި ފަރުވާކުޑަކުރުމުގެ ސަބަބުން ލޮލުގެ ކަޅިއަށް ގެއްލުން ތަކެއްވުމުގެ އިތުރުން ލޮލަށް އިތުރު ޒަހަމްތަކެއް ލިބިފައިވާ ކަމަށް ވެސް އާއިލާއިން ބުނެ އެވެ. އެހެންވެ އާއިލާއިން ވަނީ މިމައްސަލަ ތަހުގީގު ކުރުމަށާއި، ހޮސްޕިޓަލުން ރަނގަޅަށް ޖަވާބުދާރީވުމަށް އެދިފަ އެވެ.