ޔުގާންޑާގައި ބޭއްވި ބައިނަލްއަގްވާމީ ބެޑްމިންޓަން މުބާރާތުގެ އަންހެނުންގެ ޑަބަލްސް އިވެންޓުން ރާއްޖޭގެ ރިވައިވަލް ސްޕޯޓްސް ކްލަބުގެ ފާތިމަތު ނަބާހާ އާއި އާމިނަތު ނަބީހާގެ ޕެއާ ލޯ މެޑެލް ހާސިލުކޮށްފި އެވެ.
މި ޕެއާ ވަނީ ކުއާޓާ ފައިނަލުން ކާމިޔާބު ހޯދައި، ސެމީ ފައިނަލަށްވެސް ގޮސްފަ އެވެ. ނަމަވެސް ސެމީ ފައިނަލުގައި އެމީހުން ވަނީ އެމިރޭޓްސްގެ ނިދީ ދޭސާއި އާއި ސްރީޔުތުކާ ސްރީޖިތު ޕަރޯލްގެ ޕެއާއާ ކުރިމަތިލާންޖެހި، 2-1 އަށް ބަލިވެފަ އެވެ.
މެޗުގެ ފުރަތަމަ ސެޓު އެމިރޭޓްސްގެ ޕެއާއިން 21-14 އަށް ކާމިޔާބުކުރި ނަމަވެސް ދެވަނަ ސެޓު ނަބާ އާއި ނަބީގެ ޕެއާއިން 21-15 އަށް ކާމިޔާބުކުރި އެވެ. އެކަމަކު ވަރުގަދަ ކުޅުމެއް ފެނިގެންދިޔަ ތިންވަނަ ސެޓު އެމިރޭޓްސްގެ ޕެއާއިން 21-18 އިން ކާމިޔާބުކޮށް، މެޗުވެސް ކާމިޔާބުކުރި އެވެ.
މިއީ ނަބާ އާއި ނަބީ، ރިވައިވަލްގެ ޕެއާއެއްގެ ގޮތުގައި ބައިވެރިވި ފުރަތަމަ މުބާރާތެވެ.
ރިވައިވަލްއިން މި މުބާރާތުގެ ހަތަރު އިވެންޓެއްގެ ކުއާޓަ ފައިނަލްގައި ވާދަކޮށްފައިވެ އެވެ. މީގެ ތެރޭގައި އަންހެނުންގެ ސިންގަލްސްގައި ނަބާ އާއި ނަބީގެ އިތުރުން ފިރިހެނުންގެ ޑަބަލްސްގައި ޒަޔާން ޒަކީ އާއި ނިބާލް އަހްމަދުގެ ޕެއާ އަދި މިކްސްޑް ޑަބަލްސްގައި ޒަޔާން އާއި ނަބާގެ ޕެއާ ހިމެނެ އެވެ.