ޕޮލެންޑްގައި އިއްޔެ ފެށި ޔޮނެކްސް ޕޮލިޝް އިންޓަނޭޝަނަލް ފެސްޓިވަލްގައި ދިވެހިރާއްޖޭގެ ޒުވާން ބެޑްމިންޓަން ކުޅުންތެރިޔާ ލައިބާ ފާހަގަކުރެވޭ ކުރިއެރުންތަކެއް ހޯދައިފި އެވެ.
ލިތުއޭނިއާގެ ޖުލިއުސް ސުރްގެލާއާއެކު މި މުބާރާތުގެ 13 އަހަރުން ދަށުގެ މިކްސް ޑަބަލްސް ބައިގައި ވާދަކުރި ލައިބާގެ ޕެއާ ވަނީ ގްރޫޕް ހަތަރަކުން އެއްވަނަ ހޯދައި، ސެމީ ފައިނަލަށް ގޮސްފަ އެވެ.
މި ގްރޫޕްގައި ކުޅުނު ދެ މެޗުގައިވެސް ޕޮލެންޑްގެ ޕެއާތަކާ ކުރިމަތިލައި، ސީދާ ދެ ސެޓުން މެޗުތައް ކާމިޔާބުކުރި އެވެ.
މީގެއިތުރުން މުބާރާތުގެ ސިންގަލްސް ބައިގެ ގްރޫޕްގައި ކުޅުނު ތިން މެޗުވެސް ސީދާ ދެ ސެޓުން ކާމިޔާބުކޮށް، ލައިބާ ވަނީ ގަދަ 16 ގެ ބުރަށް ދަތުރުކޮށްފަ އެވެ.
މި މެޗުތަކުގައި ޕޮލެންޑްގެ ވިކްޓޯރިއާ ސިބުލްސްކާ، ހަނާ ވެރްޒޮވެކް އަދި އަލެކްސެންޑްރާ ކުރަސިއަކްއާ ކުރިމަތިލައި މޮޅުވި އެވެ.
ފާއިތުވި ދުވަސްތަކުގައި ލިތުއޭނިއަން އިންޓަނޭޝަނަލް ފެސްޓިވަލްއިން ދެ ލޯ މެޑަލް ހޯދި ލައިބާ ވަނީ މިއަހަރު ޔޫރަޕްގެ މުބާރާތްތަކުން މިހާތަނަށް ޖުމްލަ އަށް މެޑަލް ހޯދާފަ އެވެ.