އިންޑިއާގެ އެހީއާއެކު ހއ. ހަނިމާދޫގައި އިތުރަށް ތަރައްގީކޮށްފައިވާ ހަނިމާދޫ އިންޓަނޭޝަނަލް އެއާޕޯޓުގެ އާ ރަންވޭ މިއަދު ރަސްމީކޮށް އިފްތިތާހުކޮށްފި އެވެ.
ރައީސުޖުމްޖުމްހޫރިއްޔާ ޑރ. މުހައްމަދު މުއިއްޒާއި އިންޑިއާގެ ބޮޑުވަޒީރު ނަރެންދުރަ މޯދީ ގުޅިގެން މިއަދު ބޭއްވި ޕްރެސް ސްޓޭޓްމަންޓުގެ ކުރިން ވަނީ ހަނިމާދޫ އެއާޕޯޓުގައި ތަރައްގީކޮށްފައިވާ ރަންވޭ އިފްތިތާހުކޮށްދެއްވާފަ އެވެ.
ހަނިމާދޫގައި ތަރައްގީކޮށްފައިވާ ރަންވޭއަކީ 2.24 ކިލޯމީޓަރުގެ ރަންވޭ އެކެވެ. މި ރަންވޭގެ 1.4 ކިލޯމީޓަރުގެ މަސައްކަތް ނިންމާ މިދިޔަ ޖެނުއަރީ 28 ވަނަ ދުވަހު ވަނީ ބޭނުންކުރަން ފަށާފަ އެެވެ. މިއީ 136 މިލިއަން ޑޮލަރު ހޭދަކޮށްގެން އިންޑިއާ އިން ކުރިއަށް ގެންދިޔަ މަޝްރޫއެކެވެ.
ހަނިމާދޫ އިންޓަނޭޝަނަލް އެއާޕޯޓުގެ އާ ޓާމިނަލް ތަރައްގީކުރަނީ އަހަރަކު 1.3 މިލިއަން ފަސިންޖަރުންނަށް ހިދުމަތް ދެވޭ ގޮތަށެވެ.
މީގެ އިތުރުން ހަނިމާދޫ އިންޓަނޭޝަނަލް އެއާޕޯޓުގައި 2،461 މެޓްރިކް ޓަނުގެ ތެޔޮ ރައްކާ ކުރެވޭނެ ފެސިލިޓީއެއް ވެސް ދަނީ ހަދަމުންނެވެ.
ހަނިމާދޫ އިންޓަނޭޝަނަލް އެއާޕޯޓް ތަރައްގީކުރުމުގެ މަސައްކަތް އިންޑިއާގެ ޖޭއެމްސީ ޕްރޮޖެކްޓްސް ލިމިޓެޑާ ހަވާލުކޮށްފައިވަނީ ރައީސް އިބްރާހީމް މުހައްމަދު ސޯލިހްގެ ވެރިކަމުގައި ސެޕްޓެމްބަރު 25، 2022 ގައެވެ.
ހަނިމާދޫ އިންޓަނޭޝަނަލް އެއާޕޯޓް ތަރައްގީކުރަނީ ބައިނަލްއަގްވާމީ ދަތުރުތަކުގައި ބޭނުންކުރާ އެއާބަސް A320 އާއި ބޯއިންގް 737 ސައިޒުގެ އެންމެ ބޮޑެތި ބޯޓުތަކަށް ހިދުމަތް ދެވޭނެ ގޮތަށެވެ.